CEBU, Philippines - Pwerting hadloka sa usa ka 13-anyos nga dalagita dihang giguroy kini paingon ngadto sa kalibunan ug gigisian sa iyang sinena sa usa ka wala mailhing lalaking nagtaptap sa nawong kagahapon sayo sa buntag diha sa barangay Lagtang dakbayan sa Talisay.
Gituohan nga buot untang lugoson sa maong tawo ang biktima apan naatlan nga dunay niaging tawo diha sa lugar ug naluwas ang maong bata. Ang biktima uban sa iyang inahan mi-report kagahapon sa buntag diha sa Women and Children’s Protection Desk sa Talisay City Police Station.
Sa imbestigasyon ni PO2 Violeta Godinez nga sa wala pa mahitabo ang insidente ang bata uban kini sa iyang duha ka mga igsuon nga naglakaw paingon ngadto sa ilang tunghaan.
Apan giingong ang biktima miuna sa iyang mga igsuon tungod kay motubag unta sa sugo sa lawas (malibang) diha sa kalibunan.
Apan nakasugat kini og usa ka lalaki nga nagtabon sa nawong nagsul-ob og kolor puwa nga kalo ug kolor gray ug giingong ang maong tawo nangutana ngadto sa bata kabahin sa usa ka tawo kung nakaila ba kini.
Apan giingong namalibad ang bata nga wala siya kaila sa maong tawo nga gihinganlan sa nahisgutang lalaki.
Ang maong lalaki giingong milahos kini ug ang bata mipaingon na pod unta kini sa kalibunan apan ang nahisgutang lalaking nagtaptap mibalik ug sa walay igong rason giguroy ang bata paingon ngadto sa kalibunan ug dayon gigisi ang sinena sa biktima ug giisa sa taas ug paingon na unta kining ituok sa liog sa bata.
Apan ang bata naningkamot og singgit ug swerte kay dunay naaging tawo diha sa maong dapit ug gibuhian kini sa nahisgutang lalaki.
Ang nahisgutang lalaki daling midagan paingon sa ubos nga bahin sa lugar ug wala na usab kini gukora sa lalaking nakaluwas sa bata.
Gituohan nga ang maong lalaking buot untang mo among-among sa bata naa lang kini magpuyo sa lugar.
Human og report sa biktima si Inspector Margienette Yosores ang miadto sa lugar nga nahitaboan aron mopahigayon og follow-up nga imbestigasyon. (BANAT NEWS)