DENR migahi’g salapi alang sa mga liso
CEBU, Philippines - Ang Department of Environment and Natural Resources (DENR-7) migahin og P136.566 milyones alang sa produksyon sa 12.9 milyones ka mga liso sa nagkadaiyang lumad nga matang sa mga kahoy ning tuiga alang sa National Greening Program (NGP) sa Central Visayas.
Matud pa ni DENR-7 Regional Executive Director Dr. Isabelo Montejo nga kining maong pundo gigahin alang sa 24,461 ka ektaryang yuta nga giila nga kalasangan ug alang sa NGP sa upat ka probinsya sa rehiyon 7.
Subay sa giaprobahang Physical and Financial Plan (PFP) alang sa 2013 nga gipagawas sa Planning Management Division (PMD), ang probinsya sa Sugbo kinahanglang makatigom og 5.0054 milyones ka mga liso nga ikatanom sa 9, 642 ka ektarya; 3.302 milyones ka liso usab alang sa 5, 142 ka ektarya sa probinsya sa Bohol; 4.566 milyones ka liso alang sa 9, 142 ka ektarya sa Negros Oriental samtang 37,000 ka mga liso alang sa 185 ka ektaryang luna sa Siquijor.
Masaligon si Montejo nga makab-ot gayud nila ang tanan nilang gitinguha ning tuiga “With around 111 functional and efficient nurseries established and operating in the region, we are positive that we would be able to accomplish with the cooperation and assistance by our well-meaning partners and other stakeholders,†matud pa ni Montejo.
Subay sa Philippine Development Plan ni Presidente Benigno Aquino III, si Montejo mimando sa tanan niyang mga opisyales sa Provincial and Community Environment and Natural Resources sa pagtigom og sayo sa mga gikinahanglang mga liso sulod ning buwana Enero, ning tuiga aron masugdan gilayon ang pagpananom ug pagpatubo niini inig-abot sa ting-uwan.
Gipasalig ni Montejo nga ang DENR-7 adunay pasilidad aron masiguro ang produksyon sa tag-as nga kalidad nga mga lumad nga mga kahoy.
Ang nasud adunay mokabat sa 3,600 ka mga klase sa kahoy.
Ang mga gitakdang itanom aron itabon sa mga kabungtorang upaw mao ang mga nag-anam na kanihit nga matang sa kahoy dinhi sa nasud sama sa guijo or Shorea guiso, kamagong or Diospyrus discolor, red lauan or Shorea negrosensis, ug white lauan or Shorea contorta, tindalo or Afzelia rhomboidea, yakal or Shorea astylosa, molave or Vitex parviflora, ug uban pa. (BANAT NEWS)
- Latest
