Akyat Bahay Gang mihasi sa Mandaue

CEBU, Philippines - Naalarma karon  ang  kapolisan sa  dakbayan  sa   Mandaue   gumikan  sa   nagsunod-sunod  nga  pagpanglungkab  sa  nagkalainlaing  balay  patigayon  sa maong  lugar  nga  gituohang  mugna  sa Akyat Bahay Gang.

Maoy  hinungdan  nga si Sr., Supt. Petronelli  Baldebrin, hepe  sa Mandaue City Police  miluwat  og  mando  sa iyang  mga  sakop  nga  kapolisan  sa pagpatrolya  sa kadalanan sa dakbayan matag  karon  ug  unya ilabi  na  sa kagabhion aron  masumpo  ang  maong  matang  sa krimen.

Nagtuo  si Baldebrin  nga  dili  taga  Cebu  kining  mga  kawatana  apan  malagmit  gikan  kini  sa laing  dapit  kinsa  nagpabilin  pa  hangtud  karon  sa Sugbo  human  sa Sinulog.

Si Mandaue City Administrator James Abadia   nagkanayon  nga angay  paningkamotan  sa kapolisan  nga  mailhan  ang  maong  mga  kawatan aron  kapasakaan  kini  og  kiha ngadto  sa  hukmanan.

Midugang  siya  nga  angayan  usab sa  mga  molupyo  sa maong  dakbayan  nga  mosuporta  sa kapolisan  pinaagi  sa paghatag  niini  og  impormasyon  kun  may  mga  tawo  silang  makita  kansang    panlihok-lihok  katahapan  sa ilang  palibot.

Sa samang  higayon  giawhag  ni  Baldebrin  ang  mga  negosyante  nga  kinahanglang  gakotan  nila pag-ayo  ang  mga  establisemento  panahon  sa kagabhion ug  paandaron  pirme  ang  ilang   mga  video  camera  aron  makakuha  sila  og    hulagway  ingon  man  panagway   sa  mga  malambigit  sa  maong  bisyo

Alang  kang  Baldebrin  nga  ang  mga  kasong  ingon  niini  kinahanglang  tambayayungan sa  katawhan  ug  sa kapolisan  ang  pagsulbad  niini. (/WC) (BANAT NEWS)