CEBU, Philippines - Motorsiklo sa polis gilungkab sa mga kawatan samtang giparada kini diha kilid sa Talisay City Police Station sa barangay Poblacion niadtong milabay’ng adlaw hinuon ang mga kawatan nasikop kini sa gipahigayong follow-up operation niadtong Sabado sa buntag.
Ang biktima mao si PO1 Ranulfo Villaver kinsa nadestino diha sa TCPS sa mobile patrol.
Ang mga suspetsado mao sila si Arnold Chavez, 18-anyos ug Louie Diaz, 22, parehong mga residente diha sa sitio Mananga II, barangay Tabunok.
Sa imbestigasyon sa kapolisan nga giparada ni Villaver ang iyang motorsiklo diha kilid sa police station samtang nagpahigayon kini sa iyang trabaho isip patrol officer niadtong Huwebes sa alas 10:00 sa gabii hangtud niadtong Biyernes sa alas 6:00 sa buntag.
Dihang paingon na kining mopauli ang biktima gikan sa iyang duty nahibulong na lang kini nga abli na ang U-box sa iyang motorsiklo ug sa pagsusi pa niini wala na diha ang iyang sweat shirt nga kolor itom ug puwa nga dunay nakasipra sa dughan nga apilyedo sa biktima.
Nabantayan usab sa maong polis nga gisuwayan og dagit sa maong mga kawatan ang iyang motorsiklo tungod kay dunay parti sa yawe nga nabali nga nahibilin diha sa ignition key.
Usa sa mga kauban ni Villaver kinsa nagpatrolya diha sa kadalanan nakabantay og tawo nga giingong taga sitio Mananga nga nagsul-ob sa sweat shirt sa biktima hinungdan nga niadtong Sabado sa buntag nagpahigayon sila og follow-up operation.
Giingong ang maong sweat shirt sa polis gibaligya kini sa mga suspetsado sa tawo nga nagsul-ob niini.
Ang duha ka nahisgutang mga kawatan nasikop sa mga polis human kini giingong gitudlo sa ilang gibaligyaan sa sweat shirt. (BANAT NEWS)