CEBU, Philippines - Usa ka tawo ang napalgang patay human kini nga malumos niadtong miaging adlaw diha sa may Cabahug Wharf sa Mactan Channel sa barangay Looc, sa dakbayan sa Mandaue.
Ang nalumos giila nga si Roberto Capiznon, 22, taga Mantuyong dakbayan sa Mandaue.
Sumala pa nga tulo pa lang ka adlaw si Capiznon nagpuyo sa dakbayan sa Mandaue gikan sa kaulohan ug gikahimamat ang iyang duha ka higala ug sila nag-inom sa nahitaboan.
Human niini nakadesidir sila nga mangaligo apan kay pulos dili makamao molangoy didto lamang sila naglangoy-langoy kilid sa gibaradero nga barge ug nagkupot-kupot lamang kini sa pisi sa maong barge samtang mitugsaw sa tubig.
Apan sa dihang nalingaw sa ilang estorya wa mabantayi nga mitidlom na si Capiznon hinungdan nga daling mikawas ug nangayo og tabang ang duha ka barkada niini.
Nagabhian na lang sa pagpangita ang Philippine Coast Guard ug Bureau of Fire Protection sa dakbayan apan wala nila kini makit-i.
Pinaagi sa iyang mga paryente nga maoy nangunay og sawom nakit-an ra gyud ang lawas ni Capiznon apan wa na kini kinabuhi ug igo na lamang kining gidala sa St. Anne Funeral Homes sa barangay Ibabao. (BANAT NEWS)