ILOILO CITY, Philippines --- Usa ka bagitong polis ang nadakpan tungod sa pagpanghulga ug paglapas sa Comelec gun ban kagahapon sayo sa buntag samtang nakig-inom diha sa Iloilo Terminal Market sa Iloilo City.
Ang gidakop mao si Police Officer 1 Rex Totol, 26, sakop sa 3rd Company sa Regional Public Safety Battalion (RPSB) 6. Siya maoy ika- 19 nga tawong nadakpan tungod sa gun ban violation sa Western Visayas.
Sumala pa nga una pa sa iyang pagka-aresto, si Totol giingong nakig-inom sa mga higalang sila si Alvin Siaotong, 33, ug Cyril Mangalisan, 26.
Sumala pa nga nagsukbit og kalibre .45 pistola si Totol nianang tungora, giingong gisugo niya si Mangalisan pagpalit og sigarilyo ug dihang mibiya ang naulahi gikatahong kalit gipatiran ni Totol sa tiyan si Siaotong ug gitionan sa gidalang armas.
Swerteng dunay nakaresponding polis ug gi-disarmahan si Totol sa armas nga may buhing unom ka bala.
Matud pa ni Chief Supt. Agrimero Cruz, Jr., director sa Police Regional Office-6 gihingusgan nila ang kampanya kontra loose firearms.
Ang Western Visayas maoy ikaduha sa listahan nga dunay daghang nadakpan tungod sa gun ban sunod sa National Capital Region.
Sa 19 ka nadakpan , pito niini gikan sa Iloilo province; tulo gikan sa Aklan ug Bacolod City; tagduha sa Iloilo City ug Negros Occidental; ug usa sa Antique.
Trese ka low-powered ug two high-powered firearms, usa ka granada ug upat ka bladed weapons ang nasakmit ug lima na ka kaso ang napasaka ug ang laing 14 padayon pang gi-imbestigar. (BANAT NEWS)