2.7 M nanguyog sa prosisyon

CEBU, Philippines - Mas daghan karun ang debotos nga nanguyog sa Solemn Procession dihang gibanabana sa kapolisan nga 2.7 milyon ka tawo kagahapon atol sa bisperas sa Pista ni Senyor Sto. Niño karung adlawa.

Itandi sa miaging tuig, mi-abot lang og 1.6 milyon ang nanguyog, hinuon itandi sa kagahapon nga prosisyon wala mobundak ang kusog nga uwan ug wala mabaha-i ang mga debotos kun itandi sa pista sa tuig 2012.

Sa wala pa nagsugod ang Solemn Procession, gi-highlight una ang turnover ceremony sa “El Teniente dela Guardia,” ang imahe sa Sto. Niño gikan sa San Nicolas Parish ug sa “El Capitan Heneral” nga naa sa Basilica, ang orihinal nga imahe sa Sto. Niño.

Usa ka tinuod nga military turnover ang nahitabo nga gibuhat sa mga tinuod nga sundawo gikan sa Central Command.

Si Fr. Tito Soquiño, ang executive director sa Santo Niño de Cebu Augustinian Social Development Foundation Inc., nagkanayon nga ilang gi-buhi og balik ang tradisyonal nga “turnover of command.”

Kini mas na-una pang ritwal sa matag saulog kaniadto ang kapistahan sa Senyor Sto. Niño kun itandi sa fluvial procession ug sa “Traslacion.”

Ang El Teniente dela Guardia, gi-escortan sa sundalo gikan sa Philippine Navy sa paggawas niini sa San Nicolas Parish ug gi-procession  padulong sa Basilica Minore del Sto. Niño.

Sa wala pa nibiya ang El Capitan Heneral sa Basilica, usa ka mubo apan tinud-anay nga “turnover of command” ang gihimo diin ang El Teniente dela Guardia  maoy ibilin sa Basilica samtang ilibot ang Senyor Sto. Niño sa Solemn Procession.

Si Mayor Michael Rama maoy nangulo sa Cebu City Government officials sa pagsalmot sa prosisyon samtang sila si  Representatives Eduardo Gullas ug Cutie del Mar uban sa amahang si kanhi congressman Raul del Mar, nasigpatan usab sa maong prosisyon.

Human sa lima ka oras nga Solemn Procession usa ka Pontifical Mass ang gihimo nga giselebrar ni Archbishop John F. Du sa Palo, Leyte.

“Ang Diyos pinaagi ni Sto. Niño nag-bless kanato. Igo gyud nga naabot ang imahe mao gyud dayon ang pag-uwan. Unya nawala dayon,” matud pa ni Du  sa iyang homiliya kabahin sa paghabo-habo sa dayon nang pagsulod sa imahen diha sa Basilica.

“In the year of faith, diha unta nga atong pagtuo mas molambo. Ang pagsayaw dili lang sayaw-sayaw kundi pag-ampo nga kita makadawat og grasya. Apan unta mag-ampo kita nga mas mohingkod atong pagtuo,” dugang pa ni Du.

Iyaha usab gihimug-atan ang gugmang gihatag sa mga ginikanan ngadto sa ilang mga anak nga kinahanglang ihatag usab sa mga anak ngadto sa ilang mga ginikanan sama sa gihimo sa Balaang Bata.

“Dili lang kita kanunay mangayo. Tinood nga ni-ingun ang Ginoo pangayo ug hatagan kita apan kinahanglan mangita pud ta og paagi nga kita makahatag sa atong isi’g ka tawo,” dugang pa ni Du.

Gihulagway sa kapolisan nga malinawon ug walay dagkong mga insidente nga nahitabo may kalambigitan sa fluvial ug solemn procession. (BANAT NEWS)