Biyuda nga way paryente napalgang patay

CEBU, Philippines - Patay nang napalgan  sa iyang  mga silingan ang usa ka biyuda  sulod sa iyang balay sa Lower Lawaan II, dakbayan sa Talisay niadtong Lunes sa buntag.

Sa imbestigasyon nila ni SPO4 Daniel Tarucan, PO3 Ferdinand Pablo ug PO3 Benedicto Lasque, nga si Visitacion Nebria, 78,  biyuda,  nag-inusara  nga nagpuyo  sa  iyang balay ug giingong nagsalig na lang kini sa pagkaon nga ihatag sa iyang mga silingan. 

Kini  tungod  kay  wala   kini  paryente  sa  maong  lugar,  hinuon  ang  giingong  paryente niini  tua  magpuyo  sa   Camiguin, Nasayran  usab  sa kapolisan  nga   dili  pa  dugay  nadiskobrehan  kini  sa  iyang  mga  silingan  nga nanghupong  ang  lawas  ug  sagunson  ang  ubo.

Nasuta  sa  kapolisan  gikan  sa mga  silingan  nga  matag  buntag mosuroy  ang  maong  biyuda  sa iyang  mga  silingan  aron mangayo  og  pagkaon.               

Apan niadtong Lunes sa buntag nahibulong ang mga silingan  kay   wala na kini mogawas sa iyang balay hinungdan nga   ila kining gisangpit  apan wala  sila  makadungog  og  tubag.       

Sa pagduda nga adunay  nahitabo niini  gipugos   sa  mga  silingan  pag-abli  ang pultahan sa  iyang balay.       

Nakurat  na lang  ang  mga  silingan dihang  nakita  nila  nga  naghay-ad  kini  sa sawog  sa iyang  balay  nga  wala nay  kinabuhi   samtang  nahushos  na  sa iyang  paa  ang   underwear niini   ug  sa kilid sa  iyang patay’ng lawas adunay arinola.   Gituohan nga si Nebria giatake sa iyang  sakit ug walay nakatabang niini  nga  maoy  hinungdan  sa iyang  kamatayon. (WC)(BANAT NEWS)