Pintor giluba angol sa mekaniko

CEBU, Philippines - Naangol  ang  usa  ka  pintor  human  kini  lubaa  sa iyang silingan nga  iyang  gikalalis  bahin  sa yuta sa Dignos Compound, Purok 4, Barangay Kamputhaw ning Dakbayan, sa miaging  gabii. 

Ang biktima mao si Benjamin Sausa, 42, minyo,  nagpuyo sa maong  lugar, ug  usa ka  pintor, samtang ang suspek mao si Gerry Arellano, 41, usa ka mekaniko ug silingan sa biktima. 

Matud   ni  Rowena Sausa,  asawa sa biktima  nga padulong  unta  nga mopalit og beer ang iyang bana  sa maong  higayon dihang gikasugat  niini si Arellano .

Nagkahisgot  ang  duha  bahin  sa yuta  nga  gipuy-an  sa biktima nga  misangpot  sa  panaglalis kay  nangangkon man  si  Arellano  nga  siya’y  tag-iya sa yuta  nga  gipuy-an  sa biktima.  Ang  suspetsado  nga  gilupig  sa katarungan  gumikan sa kalagot  ug  kapungot  milanit  sa iyang kutsilyo  nga  giluklok sa hawak  dayon  gihansakan  ang  tiyan  sa biktima.

Maayo  gani  kay  nakalihay  og  dyutay  ang  biktima  hinungdan  nga  ang  walang  bahin  sa kilid  niini  maoy natuhab  sa samad  dinunggaban.    (/WC)  (BANAT NEWS)