CEBU, Philippines - Napalgang patay sa mga hotel attendant ang usa ka American national sulod sa iyang gipuy-ang pension house sa Brgy. Pajo sa dakbayan sa Lapulapu.
Ang langyaw nagpailang si Woody Allen base sa pagpa-ila niini sa iyang pangalan diha sa pension house nga gisak-an.
Sa pasiunang imbestigasyon sa kapolisan nasuta nga lima na ka adlaw nga nagpuyo ang maong langyaw sa maong pension house. Ug niadtong adlaw nga Huwebes nabantayan na ang kabaho sa palibot.
Tungod niini gisusi sa mga attendant ang matag lawak hangtud nga naabot sila sa lawak ni Allen nga didto maggikan ang nangalisbo sa baho hinungdan nga ilaha kining giablihan.
Sa pagsusi nila sa sulod napalgang nagbitay na sa usa ka nylon rope si Allen nga gibulibod sa liog niini ug ang tumoy didto gihikot ibabaw sa banggera.
Gituohang lapas na sa 24-oras nga namatay si Allen dihang napalgan kini.
Sa pakisusi sa kapolisan sa pangalan sa maong langyaw nagduda dayon sila sa tinud-anay nga pangalan ug pagkatawo sa maong naghikog.
Ang pangalang "Woody Allen" iya sa sikat nga American screenwriter, director, actor, comedian, author, playwright, ug musician kansang tinuod nga pangalan mao si Allan Stewart Konigsberg.Wala usab silay nakit-ang mga dokumento o mga gamit sa maong langyaw sama sa passport, airline ticket ug pitaka nga makatabang unta sa pag-ila sa maong langyaw.
Ang mga imbestigador magpatabang sa Bureau of Immigration aron mailhan ang maong langyaw nga sa pagkakaron ilaha pang gidudahang naghikog tungod kay wala silay laing nakitang timailhang may foul play sa kamatayon niini. (/EIM) (BANAT NEWS)