Permit sa tindahan sa alak duol sa eskuylahan kanselahon

CEBU, Philippines - Gibutyag ni Mayor Michael Rama kagahapon nga dili na siya mosugot nga adunay  makapamaligya og mga ilimnong makahubog duol sa mga tunghaan dinhi sa Siyudad sa Sugbo sugod karong buwana.

Gipadayag kini sa mayor human  niya mabantayi  nga nagbaha ang mga tinun-an nga  nag-inom sa mga tindahan nga duol sa tunghaan   bisan  kun  tingklase ug dili kini maayong   sud-ongon.

Dugang niini, gibutyag sa mayor nga dili  na siya motugot nga duna pa’y renewal sa  special permit niadtong  mga  tindahan  nga  mamaligya  og  alak  sa duol  sa eskuylahan.

Kahinumdoman nga ang  special permit naghatag unta og pagtugot sa mga tindahan duol sa mga eskuwelahan nga makabaligya og ilimnong makahubog apan tungod  sa pangabuso  nga  gihimo  sa  mga  estudyante  nga anha  maghubog-hubog  sa palibot  o kaha  mismo  sa sulod  sa eskuylahan, hingpit  kining  gipakanselar  sa mayor.

Natala sa  section 12 sa city ordinance 1413 o nailhan nga liquor licensing ordinance sa Siyudad sa Sugbo nga dili hatagan og permit  ang mga tindahan nga mamaligya og ilimnon  nga naa sa  100 meters perimeter o  boundary sa mga tunghaan ug hospital.

Naobserbahan usab ni Rama nga adunay mga kabatan-onan nga garbo na kaayo alang kanila nga  magtagay atubangan  sa daghang  tawo ug dili sama sa karaang panahon nga ang  mga batan-on magtago-tago pa gumikan kay ikauwaw nila nga mag-inom sa lugar  nga  dayag  sa publiko.

Lakip usab karon sa mitabang sa pag-monitor mao ang  Cebu City Anti-Indecency Board (CCAIB) kinsa maoy mobadlong sa mga nag-negosyo og imnanan nga magpataka og pasulod og  mga kustomer  bisan menor de edad.  (BANAT NEWS)