Joavan mi-deny nga siya nanakop og trak

CEBU, Philippines - Midepensa ang kontrobersyal nga anak ni Talisay City Mayor Socrates Fernandez nga si Joavan kalabot sa pasangil nga nanakop siya og trak nga may kargang balas niadtong Biyernes sa gabii diha sa barangay Lagtang sa dakbayan sa Talisay.

Kini bisan pa man og ang drayber sa trak nga si Leandro Jaberina, mitumbok nga si Joavan diha sa reklamo niini sa kapolisan nga mao gyud ang nanukit-sukit kaniya ug nangayo og dokumento sa delivery sa mga balas.

Giingong wala matagbaw si Joavan sa gipakita niyang dokumento ug gipadala ang maong truck diha sa city hall.

Si Joavan nga mitawag sa Banat News mipadayag nga wala gyud siya sa maong lugar dihang nahitabo ang pagbabag sa maong trak.

“Ingon sila ako’y nagdakop kana sorry gyud kay di gyud ako kay akong mga tawo maoy nag-intercept wala ko atong operasyona les,” pasabot pang Joavan.

Gani, iya usab nga gipadayag nga ulahi na kaayo siyang nakahibalo kabahin sa maong report.

“Na-surprise ug na-shock jud ko kay wa ko kahibaw adto.  Ngano gud ‘tawon ako ilang pasanginlan adto nga wa man ko didto pagdakop binuang man to ilaha, grabiha, ” matud pa ni Joavan kinsa makadaghan nang higayong nalambigit sa mga kontrobersya ug bikil sa kapolisan sa mga nangaging mga tuig. Gipadayag usab ni Joavan nga base sa iyang nasayran, igo lang nga gidala sa city hall ang sakyanan apan gibuhian gihapon dihang nasuta nga kompleto ang papeles niini.

Matud pa nga ang tag-iya sa usa sa mga trak nga usa ka Julius Abad maoy nagdumili una pagkuha sa iyang trak bisan kini gi-release na human ma-check ang papeles kay buot pa niining mopasaka og kaso batok kang Joavan.

Gihulagway kini ni Joavan nga nangita lang gyud og gubot. (Lesley Caminade-Vestil/EIM) (BANAT NEWS)