Beteranong magsisibya nga si Jun Kintanar mitaliwan

CEBU, Philippines - Beteranong magsisibya ug kanhi bise mayor sa siyudad sa Sugbo nga si Vicente “Jun” Kintanar Jr. mitaliwan na human kini ma-admit sa tambalanan. Si Kintanar naila isip radio announcer sa dyVM sa tuig 1960-1964. Mibalhin kini sa Cebu Broadcasting Corporation nga mas naila karon isip dyRC. Nahimo siyang tsirman sa Kapisanan ng mga Brodkaster ng Pilipinas sulod sa lima ka tuig. Niadtong tuig 1980, misulod siya sa politika ug nakadaog ug nahimong First Councilor sa Cebu City ug human sa iyang termino, milingkod isip vice mayor sa tuig 1983-1986.

Nahimo usab kini first councilor niadtong 1988 ug niadtong tuig 2002 nibalik sa politika si Kintanar hulip kang Konsehal Firmo Dayao. Si Kintanar usa sa mga nangamahan sa pipila ka ordinansa sa siyudad sa Sugbo sama na lang sa saktong pagkolekta sa basura, katukoran sa tourism commission ug uban pa.(EIM) (BANAT NEWS)