Tulisan gisuklan patay

CEBU, Philippines - Patay ang usa ka suspetsadong tulisan human kini madunggabi sa attendant sa Angel’s Burger nga iyang gitulis kagahapon sa kaadlawon diha sa barangay Poblacion, dakbayan sa Talisay.

Ang giingong tulisan mao si Junry Escare, 20-anyos taga sitio Kimba, barangay San Roque, Talisay. Siya nadunggaban sa tindero nga si Ambrosio Candole Jr., 27, kinsa nangunay pagtahan  sa kaugalingon nila ni PO3 Benedicto Lasque ug PO3 Ferdinand Pablo sa police station.

Matud pa ni Lasquez si Escare maoy gitumbok nga midunggab patay sa usa ka kostumer sa usa ka kan-anan diha sa sitio Nonoc Tabunok niadtong tuig 2011 apan nitago kini sa laing lugar ug mibalik ra usab pagkalinaw-linaw na.

Sa imbestigasyon sa mga polis nga usa ka wala mailhing lalaki kinsa nagsakay og motorsiklo ang nagpasumangil nga kostumer ug mi-order kini og usa ka hamburger.

Si Escare giingong kalit lang mitungha diha sa walang bahin sa burger stand ug mition og pusil kang Candole dayon sulti nga “tulis ni bay, kwarta ray amo, ambi nang kwarta nimo!”

Sa kahadlok sa biktima gitunol niini ang kahon nga butanganan sa halin ug niadtong higayona P50 pa ang sulod sa kahon apan giingong nasuko ang suspek tungod kay gigamyan kini sa halin ug gipusil si Candole duha ka higayon.

Apan gikatahong mikagar ang armas ug wala gyud makabuto hinungdan nga nakiglayog si Candole ug sa kabalaka sa biktima nga mapusilan gyud siya gipunit niini ang kutsilyong panghiwa og burger ug gidunggab ang suspek.

Si Escare kinsa nakaangkon og usa ka samad dinunggaban sa iyang walang dughan nakabuhi sa pusil ug mikaratil og dagan sa iyang kauban nga naghuwat apan sa karatol usab sa kauban wala dayon makapaandar sa motor.

Si Candole daling midagan padulong sa police station ug mitug-an sa nahitabo dala ang kutsilyo ug ang usa ka kalibre .38 nga revolver nga dunay upat ka mga buhing bala ug duha ka “dud bullets” nga giingong iyang nailog gikan sa suspetsado.

Dangtan pila ka minutos nakadawat og tawag ang kapolisan kabahin sa usa ka lalaking nadunggaban nga gidala sa Talisay City District Hospital.

Ang maong lalaki giingong napalgan sa mga nag-roving nga mga tanod sa barangay Dumlog ug maoy midala kaniya sa TCDH apan namatay kini. Si Lasque ug Candole daling miadto sa maong tambalanan ug didto gikompirmar ni Candole nga mao kadto ang tawong mitulis ug misuway og pusil kaniya nga iyahang nadunggaban.

Na-recover sa mga polis gikan sa patay’ng lawas sa suspetsado ang usa ka Cherry Mobile C1i nga kolor itom nga cellphone, usa ka kolor gray nga Nokia C2 nga cellphone, usa ka Cherry Mobile nga kolor puwa, usa ka itom nga panapton nga itaptap sa baba ug ilong, usa ka itom nga bonnet, laing bonnet nga kolor stripe puwa, yellow ug green, pink nga pitaka sa babaye nga dunay sulod nga P240 nga kwarta, nagkalain-laing yawe ug green t-shirt.

Ang mga polis nagpahigayon og follow-up operation batok sa usa ka kauban sa suspetsado.

Ang amahan ni Escare nagdumili og hatag og pamahayag dihang gi-interview sa mga sakop sa media.

Sa laing bahin, si Candole kinsa usa ka tuig nang kawani sa Angel’s  Burger mibutyag sa mga tigbalita nga gibati siya og kabalaka  sa iyang kinabuhi human sa maong hitabo.( /EIM) (BANAT NEWS)