P50 mil nga mga pabuto gibubo-an og tubig diha sa City Hall kagahapon
CEBU, Philippines - Mokabat sa kapin sa P50,000 nga mga pabuto ang gipangbasa kagahapon diha sa atubangang bahin sa Cebu City Hall.
Gisaksihan kini mismo ni Mayor Michael Rama ug uban pa nga mga sakop sa Task Force Pabuto sa dakbayan.
Sumala pa sa city market administrator Raquel Arce nga nasakmit nila ang mga pabuto niadtong nagsingabot ang Pasko ug Bag-ong Tuig sa mga sidewalk vendors ug nagkadaiya nga establisamento nga tataw kaayo nga nakalapas sa ordinansa sa siyudad sa saktong pagpamaligya og pabuto.
Ang siyudad nagtugot lang sa mga vendors nga makabaligya og pabuto diha sa South Road Properties (SRP) aron maseguro ang kaluwasan sa katawhan.
Nalakip sa gipangbasa mao ang music festival, judas belt, shotgun, beauty in the sky, ug uban pa.
Nasayran nga miminos ang mga namaligya og pabuto diha sa SRP niadtong 2012 gumikan kay kapin lang kini sa 40 ka mga stall kumparar sa 80 ka mga stall niadtong 2011.
Ang matag stalls diha sa SRP adunay igong distansya ug aduna’y naka-standby nga fire truck aron adunay dali nga makaresponde kung dunay emerhensya nga mahitabo. (/EIM) (BANAT NEWS)
- Latest
