‘Political downfall’

CEBU, Philippines - Kung ang usa sa kaatbang sa politika sa mga Garcia ang pasulti-on gihulagway nila nga political down fall sa mga Garcia ang pagkasuspenso ni Gov. Gwendolyn Garcia.

Mao kini gibutyag ni Pinamungahan mayor Geraldine Yapha nga maoy kandidatu sa Liberal Party ug kaatbang sa nasuspensong gobernador kinsa midagan usab sa pagka-kongresista sa ikatulong distrito.

Si Garcia anaa na sa ikatulo ug katapusang termino sa pagka-gobernador sa probinsya sa Sugbo. Atol sa pagdumala ni Garcia sa tulo niini ka termino mas nailhan pa gyud ang Sugbo tungod sa mga programang gipatuman niini ilabi na sa turismo.

Matud ni Yapha atol sa interview sa DyDD nagtuong apektado dili lang ang nasuspensong gobernador kay hasta ang tanang pamilyang Garcia nga naghupot og posisyon sa gobiyerno dinhi sa Sugbo naapektuhan usab.

Ang ubang kabanay sa mga Garcia nga naghupot og posisyon sa gobyerno mao sila si kongresista Pablo Garcia sa 2nd district amahan niini, igsuon nga si kongresista Pablo John Garcia sa 3rd district nga maoy nihulip og kandidatu pagka- gobernador sa One Cebu, igsoon nga sila si Dumanjug mayor Nelson Garcia ug Barili Vice Mayor Marlon Garcia.

Giangkon ni Yapha nga tungod sa nahitabo sa kapitolyo nakabintaha siya sa panag-atbang nila sa gobernador sa pagka-kongresista sa 3rd district sa umaabot nga eleksyon.

Matud ni Yapha sa iyang mga gihimong suroy-suroy sa kalungsoran sa distrito ilabi na sa lungsod sa Asturias sa nilabay’ng semana nahimong sumsuman sa estorya ang nahitabo sa Kapitolyo ang pagmagahi sa gobernador nga tumanon ang kamandoan sa presidente.

Dugang ni Yapha nga bisan pa sa wala pa gipakanaug ang suspension order batok kang Garcia kompiyansa na siyang daan nga mas dako siya og tsansa sa umaabot eleksiyon tungod kay lumad sila taga tresiro distrito.

Gisandigan usab ni Yapha ang background sa ilang pamilya ilabina ang iyang amahan nga si kanhi kongresista Antonio Yapha nga tulo ka termino nga nahimong kongresista sa distrito ug walay buling sa mga isyu sa kurapsyon ug pagpangabuso.

Ni-apelar si Yapha kang Garcia nga mosanong sa balaod pinaagi sa pagkanaug sa kapitolyo aron pagtuman sa suspension order.

Si Garcia kusganong mipadayag nga illegal ang gipakanaog nga suspension batok kaniya. Apan si Cebu City Mayor Michael Rama, ang suod higala ug kaalyado ni Garcia sa United Nationalist Alliance party miingon nga dili kini maoy katapusan sa mga Garcia.

Matud pa ni Rama , naa ra sa mga kamot sa katawhan ang pagdesisyon ug kombinsido siyang dili basta lang mahugno si Garcia tungod sa kadaghan sa mga maayo niining nahimo sa iyang pagka-gobernador sa Sugbo.

Dugang pa sa mayor nga gawas sa probinsya sa Sugbo, nakatabang usab si Garcia sa dakbayan sa Sugbo ilabi na sa mga nabiktima sa sunog, mga pagpanindot sa mga kadalanan sa siyudad ug sa pagtabang niini sa ubang mga silingang probinsya. Niadtong adlaw nga Domingo, liboang mga supporters ni Garcia ang mipahigayon og “freedom march” agi og pagpakita sa ilang suporta sa gisuspensong gobernador.  - /EIM (BANAT NEWS)