CEBU, Philippines - Mihuboy ang mga dagway sa tulo ka mga babaye human kini hapaka og bato sa usa ka hubog nga nanghasi didto sa Brgy. Basak dakbayan sa Mandaue sa milabay’ng gabii. Ang mga biktima mao sila si Aida Limatong, 55, minyo, Gwendolyn Climaco ug Rosiano Hayag , pulos hingkod ug mga residente sa maong dapit.
Samtang ang suspetsado mao si Randy Gador, hingkod ug molupyo usab sa maong dapit.
Matud pa ni Limatong nga hubog si Gador sa dihang miduol kini kanila ug kalit nanghasi sa ilang atubangan.
Unya ang tulo wala makabantay sa dihang kalit kining gihapak og bato ni Gador sa ilang mga dagway hinungdan sa pagka-wingig nila uban sa mga bun-og nga ilang nahiagoman.
Ang tulo ka babaye gidala sa tambalanan samtang si Gador dali nga nasikop sa kapolisan. Ang mga biktima mibahad nga mopasaka og kaso batok ni Gador kinsa nagkagulkol na karon sa prisohan sa Mandaue City Police Office. (/WC) (BANAT NEWS)