Drug user namag-ong tuig sa prisohan

CEBU, Philippines -  Didto mosugat sa Bag-ong Tuig 2013 ang upat ka mga   mga drug user  kinsa nadakpan  sa kapolisan sa dakbayan sa Mandaue samtang  naghingus og shabu sa managlahing takna ug dapit  sa katapusang  adlaw  sa 2012.

Ang suspetsado nga si Miguel Cuizon,  19, ulitawo nga nagpuyo sa sitio Centro sa barangay Labogon sa maong dakbayan maoy nadakpan nila ni Senior Inspector Wilson Abot, hepe sa Presinto 3   sa alas 5:00 pasado ang takna sa buntag niadtong miaging Domingo.

Si PO2 Richard Ares sa kapolisan sa Presinto 3 nga nagbase sa barangay Basak sa maong dakbayan nga nahinabi sa Banat News miingon nga nakaeskapo si  Cuizon dihang gihimo ang buy-bust operation sa miagi pang tuig.

Bisan kun nakasibat kini sanglit lig-on man ang mga ebidensiya nga ilang nasakmit maoy hinungdan nga gipasakaan  og kaso ngadto sa korte ug giluwatan gilayon og  warrant of arrest   ug  nasikop  usab dayon  ug gibalhog   dayon  sa ilang detention cell.

Ang laing tulo nga nadakpan sa paghingus og shabu ug nabalhog usab karon sa bilanggoan mao sila si Ludirico  Rosal, 34, Cesar Legaspi, 31 ug Renato Conje nga pulos nagpuyo sa barangay Guizo, dakbayan sa Mandaue.

Matud pa ni PO2 Bryan Berenguer sa kapolisan sa Presinto 1 sa barangay Centro  nga usa ka Jesus Peralta, 45, nga nagpuyo sa maong lugar   kinsa  usa ka level 2 drug pusher mao unta ang ilang dakpon sa maong higayon.

Dugang pa ni PO2 Berenguer dihang mopalit na unta    og shabu  si Peralta nakamatikod kini  nga  may  mga  polis  sa palibot nga  maoy hinungdan nga  nakalayat  kini  sa koral ug mikaratil og dagan  pahilayo sa maong dapit. (WC)(BANAT NEWS)