Mga pabuto gi-“bagsak presyo”

CEBU, Philippines -  Gumikan sa kanihit sa mga mopalit og pabuto bagsak na ang presyo niini nga gipamaligya sa firecrackers zone sa Brgy. Babag dakbayan sa Lapulapu.

Si Linda (tinuod ngan gitago) naninda og pabuto sa usa ka stall sa Brgy. Babag mipadayag nga naalkanse sila   ning tuiga kung itandi sa milabay’ng mga tuig diin sila anaa pa magpwesto sa kamerkadohan.

Matud pa ni Linda gumikan sa kadaghan sa mga naninda sa ilang nahimutangan gamay ra sila og halin sukwahi kung ibulag-bulag sila og display sa ilang mga tindang pabuto sa palibot sa dakbayan sa Lapulapu kay mas kusog ang halin sa ilang mga baligya.

Gumikan niini nakahukom nalang sila nga mopaubos sa ilang presyo karong panahona hangtod Enero 1, 2013.

Samtang higpit ang pangandam nga gihimo sa kapolisan sa Metro Cebu sa pagsugat karong sa tungang gabii sa Bag-ong Tuig pinaagi sa pagpahigayon nila og patrolya ug checkpoints.

Gawas sa naandang anti-criminality campaigns, lakip sa  himuon sa kapolisan mao ang pagbadlong sa mga tawong magpataka og pabuto ug ang mamaligya og pabuto sa dili firecracker zone. (EIM)(BANAT NEWS)