2 tawo mikirig patay

CEBU, Philippines -  Duha ka tawo ang dili na makaabot pa sa Bag-ong Tuig duha ka adlaw gikan karon human nakalas sa buwag nga aksidente sa kuryente kagahapong adlawa.

Patay nang nahidangat sa tambalanan ang mag-uumang si Marlo Borba, 18,  human makuryentihi pasado alas-9 kagahapon sa buntag diha sa Sitio Tawagan barangay Sirao dakbayan sa Sugbo.

Sa pasiunang imbestigasyon sa Homicide Section gikan pa nangaligo ang biktima uban sa iyang mga higala ug naglakaw balik sa ilang mga balay dihang aksidente niining nahikapan ang usa ka naputol nga live wire gikan sa poste sa Visayan Electric Cooperative (VECO) sa maong dapit.

Matud pa nga kalit lang nga nahagba ang biktima ug gitabang sa mga higala pagdala sa Guba Emergency Hospital apan giingong gideklarar kini nga dead on arrival.

Gisusi pa sa kapolisan kung kinsay angayang manubag sa maong aksidente.

Samtang patay ang usa ka maintenance worker sa Lucky Tableware Inc. sa dalan H. Abellana sa barangay Cubacub, dakbayan sa Mandaue dihang ang gipas-an niya nga GI sheet kon sin  nasaghid sa live         wire.

Ang biktima si Gilbert Pamaybay, 40,  kalit nga mikirig  samtang nagpas-an sa sin pasado alas-4 ang takna sa hapon niadtong miaging adlaw diha sa iyang gitrabahoang pabrika.

Si PO1 Marivic Apol sa  Presinto 6 sa Mandaue City Police Office (MCPO) nga nagbase sa barangay Canduman nga nahinabi sa Banat News miingon nga ang insidente nasaksihan sa ilang maintenance head nga si Hilton Sy ug uban pa nga mga trabahante nga sila si Avelino Dayanan, 57, nga taga lungsod sa Aloguinsan ug Randel Arellano, 18, nga taga lungsod sa Tabuelan, Cebu.

Dugang pa niya nga naghakot og sin ang namatay kuyog sa pipila ka mga kauban nga ila untang itabon sa gitapok nga bagol sa lubi sa gawas sa ilang bodega aron dili kini aksidenteng matagakan og pabuto gikan sa mga magpabuto atol sa pagsugat ugma sa Bag-ong Tuig aron dili kini masunog.

Dugang pa niya nga dihang gipas-an ni Pamaybay ang gihapnig nga mga GI sheet kalit nga mikirig si Pamaybay ug natumba sa yuta.

Dali untang gidala ang biktima sa iyang mga kauban sa trabaho sa Eversely Child Sanitarium Hospital sa barangay Jagobiao sa maong dakbayan apan gideklarar kini sa mga doktor nga dead on arrival. (EIM)  (BANAT NEWS)