Quinta nakapa-blackout sa norte

CEBU, Philippines - Gihakop sa katibuk-ang kangitngit  ang halos tanang mga dapit sa mga lungsod sa amihanang Sugbo   lakip na ang isla sa Camotes ug isla sa Bantayan gumikan  sa bagyong  Quinta nga  mikusokuso  sa  maong  mga  lugar kagahapon.

 Si Acting Governor Agnes Magpale nibutyag atol sa interview sa Bantay Radyo nga sa labing uwahing report nga iyang nadawat alas 8:55 kagahapon sa buntag  ang Bantayan Electric Cooperative (BANELCO) nga maoy nag-supply og kuryente sa tibuok isla sa Bantayan nga gilangkoban sa lungsod sa Sta Fe, Madredijos ug Bantayan  wala  makaandar  tungod sa pagkatumba  sa   mga  poste  sa  kuryente niini.

Ingon  usab  niini  ang nahitabo  sa Camotes   nga napalyar  ang  andar  sa  Camotes Electric Cooperative (CELCO) nga maoy nag-supply og kuryente sa tibuok isla sa Camotes nga gilangkoban sa mga lungsod sa Pilar, San Francisco, Poro ug Tudela.

Samtang ang Cebu Electric Cooperative (CEBECO) palyado  usab  ang  80 porsyento   sa serbisyo  niini  didto  sa 4th district hinungdan  nga  nag-brownout  ang lungsod  sa Catmon  lahos  ngadto  sa lungsod  sa Tuburan  sumala  kang  Magpale.

Hinuon    walay gika-report   bahin  sa kinabuhing  nakalas  ug  ubang  mga dagkong  kadaot  sa kabtangan  gawas  sa duha ka balay  nga natumbahan og kahoy didto sa lungsod sa Sogod  sumala  sa  acting governor.

Matud ni Magpale daghang mga punoan sa saging ug kahoy ang nangatumba  sa  Tuburan, Catmon ug  didto  sa Camotes  nga  gilampurnas  sa hangin  sa bagyong  Quinta.

Sumala  kang  Magpale  nga  may landslide nga nahitabo didto sa Cansumoroy sa lungsod sa Balamban ug  may  mga kahoy  nga  nangatumba  sa karsada  sa lungsod  sa Sogod  ug  Catmon

Hinuon matud  ni  Magpale nga  mipasalig ang   mga tagdumala sa  Banelco, Celco ug Cebeco nga  dalion  nila  ang  pagtrabaho  sa  mga nadaot  nga  linya  ug  ingon  man  ang  pagpabangon  sa   mga  poste   aron mahibalik  dayon  ang  normal  nga  serbisyo  sa kuryente  sa nahisgutang  mga  lugar.

Hinuon  matud  ni  Magpale nga niadto pang Domingo gitigom na  niya  ang  opisyal sa  Provincial Disaster Risk Reduction and Management Council (PDRRMC) alang  sa  pagpangandam sa pag-abot  sa bagyong Quinta.

Gipasalig ni Magpale nga 24 oras nga  nag-monitor ang PDRRMC ug  maoy  igo  usab  nga  supply ang Provincial Social Welfare Office (PSWDO) sa  mga  pagkaon  ug  uban  pang  hinabang  alang sa mga  nabiktima  sa natural nga katalagman.

Samtang  sumala ni Alice  Canasa  ang weather specialist  sa PAGASA nga  ang  Quinta  atua  na  sa Coron,  Palawan  karong  buntag  ug malagmit  padayon  na  kining  mobiya  sa nasud.

Matud  niya  nga  ang  Quinta  maoy  ika-18  ug  katapusan  nga bagyo  niining  tuiga.

Ang  Pilipinas naandan  na  nga  duawon sa 19  ngadto sa 20  ka bagyo  matag  tuig. (WC)(BANAT NEWS)