Demolisyon sa Tejero sugdan karon

CEBU, Philippines - Sugdan na karong adlawa ang  clearing operation nga ilusad  sa Prevention Restoration Order Beautification and Enhancement (Probe)   sa pipila ka  mga kabalayan sa Barangay Tejero niining Siyudad sa Sugbo.

Nagkanayon ang hepe sa Probe nga si Raquel Arce nga  unom ka balay ang unahon  pagguba  karong adlawa  ug isunod dayon   ang  laing  39  ka balay  sa umaabot nga mga adlaw.

Nagkanayon si Arce nga dugay na nilang  gihatag  ang  notice of demolition   sa  mga  hingtungdang  pamilya  nga  papahawaonon  sa maong  lugar  ug  kutob ra  niadtong Disyembre 24  ang  ilang  gitagal  nga deadline.

Apan  hangtud  karon  matud pa  ni Arce  nga  wala  gyud  mokihol  ang  mga  hingtungdan   hinungdan  nga mapugos  sila  sa  pagpangunay  og  guba  sa ilang   mga  balay.

Matud  pa  ni Arce  nga   ang  lugar  nga limpiyohan  sa kagamhanan  gidesinyo  na  nga alang sa  drainage   system nga  palutsan  sa  tubig  sa  siyudad  aron  dili  makamugna  og  baha  sa panahon  sa tinguwan.

Hinuon  may  giandam  na  nga  relocation site  ang kagamhanan  alang  sa  mga apektadong  pamilya  sa  Tejero.             

Gawas sa relocation site, makadawat  pa    ang matag  pamilya  og  P10,000 nga cash assistance . Dugang pa niya nga adunay mga  pamilya nga boluntaryong moguba sa ilang mga balay karong adlawa.  (WC) (BANAT NEWS)