CEBU, Philippines - Samtang wala pay tubag gikan sa Bureau of Animal Industry sa Department of Agriculture, ang Talisay City Veterinary Office temporaryo unang mihunong sa ilang pagpanakop og mga libud-suroy nga mga iro sa siyudad.
Kahinumdoman nga niadtong buwan sa Nobiyembre niining tuiga ang Cebu South Dogs Club Inc. miawhag sa kagamhanan sa siyudad sa pagpahunong sa “tambutso gassing” sa mga iro.
Ang mga irong libud-suroy nga masikop sa dog pound kung wala’y molukat niining mga tag-iya isulod sa usa ka gas chamber ug adto patyon pinaagi sa tambutso gassing.
Gihulagway sa maong grupo nga ang maong paagi sa pagpatay sa mga iro dili makiangayon ug nakalapas kini sa Akta Republika 8485 kon “Animal Welfare Act of the Philippines”.
Si Talisay City Veterinarian, Dr. Santiago Hortel nagkanayon nga “confusing” ang “Administrative Order Series of 2011” sa Department of Agriculture.
Matud ni Hortel nga nabutang sa maong AO nga ang carbon monoxide “acceptable” o pwede kini isip pamaagi sa euthanasia o mercy killing sa mga iro.
Ang city veterinarian niadtong milabay’ng semana nagpadala og suwat ngadto sa BAI pagpiho sa maong AO ug samtang wala pa sila’y tubag temporaryo lang una nilang gihunong ang ilang operasyon sa pagpanakop og mga libud-suroy nga iro.
Ang dog pound sa siyudad matag buwan makadakop og tag 50 ka mga libud-suroy nga iro. (WC)(BANAT NEWS)