4 ka driver positIBo sa illegal drugs

CEBU, Philippines -  Isip pagpatuman sa Oplan Ligtas Biyahi sa Land Transportation Office upat ka mga drayber ang naigo gilayon niini human  masakpi  nga positibo  sa paggamit  og   illegal nga drugas.

Ang LTO-7 mipahigayon sa miaging adlaw og random drug test sa kapin 30 ka mga drayber diin upat niini ang nasuta  nga positibo,  nga  naglangkob  sa   duha   ka  drayber sa  PUJ ug laing duha sa bus.

Si LTO7  Regional Director  Raul Aguilos mibutyag pinaagi  sa Banat News nga aduna sila’y gihimong road worthiness test ug ingon  man pagpahigayon og lecture sa mga drayber kalabot sa road safetiness.

Dugang pa ni Aguilos nga kasamtangan usab silang mipahigayon   og monitoring sa tanang mga sakyanan nga overloading nga maoy posibling hinungdan sa disgrasya.

Samtang gipahibalo usab ni Aguilos nga andam silang modawat og reklamo kalabot sa mga sakyanang mamili og pasahero ilabi na ang mga taxi driver.

Gipanghinaot ni Aguilos   nga makig-alayon kanila ang katawhan aron mahimong luwas ug malinawon ang ilang pagbiyahi.

“Ang amo lang sa LTO nga hinaot unta nga safe and secure ang biyahi sa tanan nga biyahidor  pinaagi sa atong pagtinabangay" tipik sa gipadalang text ni Aguilos

Gibutyag usab ni Aguilos nga gikinahanglan ang tanang mga pasaherong mobiyahi mosakay lang sa mga legal nga sakyanan.

"Kinahanglan nga sakay lang ta sa legal nga transport facilities  aron malikayan ang  dagkong  problema  sa biyahe,  matud pa ni Aguilos.( WC)  (BANAT NEWS)