CEBU, Philippines - Mokabat sa P1.5 milyones ang gahin nga ihatag sa kagamhanang local sa dakbayan sa Lapulapu ngadto sa mga biktima sa bagyong “Pablo” didto sa Mindanao.
Kini ang gikonpirmar ni Lapulapu City Mayor Paz Radaza atol sa Christmas party sa Association of Barangay Captains (ABC) didto sa Hoopsdome Sports and Cultural Complex sa miaging adlaw.
Si Congressman Arturo “Boy” Radaza maoy mibutyag sa maong gahin kinsa nagkanayon nga bisan pa sa kamanduan sa Malacanang nga nagdili sa bongga nga Christmas party sa mga ahensiya sa kagamhanan, apan dili siya buot nga mawad-an og kalipay ang mga empleyado sa dakbayan sa Lapulapu sa panahon sa pasko kay kausa ra kini sa usa ka tuig mahitabo.
Gumikan niini nagkasabot si Cong. Radaza ug Mayor Radaza nga ilang ipadayon ang ilang Christmas party ug lahi usab ang gahin alang sa mga nabiktima sa kalamidad.
Sa ilang regular session sa konseho sa dakbayan sa milabay’ng Dec. 19 ilang giaprobahan ang gahin nga P1.5 milyones alang sa mga biktima sa bagyong “Pablo” sa Mindanao.
Matud pa ni Mayor Radaza dili na kinahanglang moadto sila sa Mindanao aron sa paghatud sa maong donasyon.
Kini tungod kay ila kining ipaagi sa DSWD dinhi sa Region 7 ug sa DSWD sa Region 11 sa Davao ug sila na maoy moapod-apod niini ngadto sa mga apektadong lugar nga nabiktima sa maong trahedya.
Gumikan niini malipayon ang mga empleyado sa kagamhanang lokal sa dakbayan sa Lapulapu nga gipadayon ang maong kasaulogan pinaagi sa ilang Christmas party karong adlawa Dec. 23, 2012 sa Hoopsdome Sports and Cultural Complex. (WC)(BANAT NEWS)