Mayor Radaza gipasanginlang nanghasi sa kalihokan sa barangay

CEBU, Philippines -  Mireklamo ang kapitan sa Brgy. Agus dakbayan sa Lapulapu ug miakusar ni Mayor Paz Radaza nga mi-harass kanila atol sa usa ka kalihukan nga gipahigayon sa ilang kaugalingong covered court sa milabay’ng hapon.

Matud pa ni Agus Brgy. Kap. Remegio “Bo” Oyao sa milabay’ng Disyembre 19 samtang mipahigayon sila og kalihukan sa covered court sa ilang barangay diin ang usa ka Japanese school foundation nang apod-apod og mga regalo sa 120 ka pamilyang kabus sa maong barangay.

Sumala pa nga kalit lamang silang gipaundang ug gipapahawa sa mga sakop ni  Radaza gumikan kay ilang gamiton ang maong gym sa gikatakdang pagpanghatag og Christmas gifts ngadto sa mga senior citizen.

Matud pa ni Oyao unang nangayo og permit sa barangay ang Regence College (Japanese Foundation) alang sa maong kalihukan ug nakugang na lang sila nga kalit lang nga ang migamit mao ang grupo ni Radaza.

Apan si Radaza sa iyang bahin mipadayag sa mga sakop sa media nga daan nang nahibalo ang barangay nga sa maong adlaw ipahigayon sa lokal nga kagamhanan ang pagpanghatag sa mga “Christmas gifts” ngadto sa senior citizens sa ilang tagsa-tagsa ka mga gyms sa siyudad , lakip na niini ang sa barangay Agus.

Gumikan niini mitumaw ang kasamok tali sa mga sakop sa mayor ug mga sakop ni Oyao. Dihadiha miabot si Radaza uban sa mga polis ug sa dihang wala makapakita og permit gikan sa city hall ang barangay sa ilang kalihukan gipabalhin ni Radaza ang kalihukan sa mga Hapones ngadto sa Brgy. Hall sa Agus.

Matod pa ni Radaza dili siya buot nga mahasol ang mga senior citizens gumikan sa ilang kahimtang nga hinay na kini og lihok ug ang uban gisakwat na lang sa ilang mga kabanay.

Si Oyao usa sa midagan pagka-kongresista sa dakbayan sa Lapulapu ug makaatbang sa bugtong anak ni Mayor Radaza nga si Aileen Radaza ug ang kandidato sa Liberal Party nga si Angel Rodriguez sa umaabot nga 2013. (/EIM) (BANAT NEWS)