P11M hinabang alang sa mga mag-uuma

CEBU, Philippines - Kapin sa P11 milyones ang gikatakdang ipanghatag ngadto sa mga mag-uuma alang sa pagpamalit og mga ekipo sa umahan dinhi sa lalawigan sa Sugbo sa sunod tuig.

Ang Department of Agrarian Reform 7 mipahibalong gihingusgan ang pagpanghatag og hinabang ubos sa Agrarian Reform Community Connectivity and Economic Support Services Program (ARCESS).

Matud ni Atty. Jonathan Sinco, Assistant Regional Director for Operations, giaprubahan na sa DAR ang P11 milyones nga pundo alang sa Sugbo aron sa pagpalit og mga nagkadaiyang mga ekipo sa pagpanguma ug pagbansay-bansay.

Tinguha usab nga maapil sa maong programang Enhanced Rice, Vegetable ug Sugarcane Production apil na usab ang Dairy Farming.

Ang mga lugar sa tirsero distrito ang makadawat sa kinadak-ang bahin diin mokabat kini og P4.3 milyones alang sa dakbayan sa Toledo ug lungsod sa Pinamungahan ug Asturias.

Gani si DAR Secretary Virgilio de los Reyes bag-ohay lang nga mibisita sa Asturias aron inagurahan ang maong programa sa Agrarian Reform Beneficiary Organization (ARBO) ug Pundok sa mga Mag-uuma (PUMAG).

Misunod ang dakbayan sa Bogo ug lungsod sa Medellin og P2.5M alang sa pagpalit og mga tractor. Ang lungsod sa Liloan sa kinto distrito makadawat og P2.25M alang sa pagmuntar sa usa ka Milking Park Plant.

Parehong makadawat sa tag P1.2M ang primero ug segundo distrito sa Sugbo; apil niini ang dakbayan sa Carcar ug lungsod sa Sibonga, Argao, Ronda ug Moalboal.

Ang ARCESS usa ka panagtambayayong sa gobiyerno, state universities, kolehiyo, komunidad ug mga pribado ug mga publikong organisasyon. (Liezl M. Frasno/EIM)

Notadong ‘pusher’ nadakpan sa buybust

Ni Darrel Carumba

Nadakpan atol sa buybust operation sa kapulisan ang gipasanginlang notadong drug pusher nga nabutang sa watchlist sa kapulisan diha sa ilang balay sa barangay Consolacion sa lungsod sa Dalaguete niadtong Miyerkules sa alas 5:00 sa hapon.

Ang nadakpan mao si Ranilo Mejares dela Peña, 26, way klarong trabaho ug nagpuyo sa maong lugar.

Nakuha gikan sa iyang posisyon ang tulo ka pakete sa shabu, buybust money nga P500 ug laing P440 nga gituohang halin sa ginadiling drugas. Matud ni SPO1 Veronico Centino, desk officer sa Dalaguete Police Station dihang nahinabi sa Banat News, dugay nang nadungog ang suspek nga tigbaligya og ilegal nga drugas diha sa  maong lugar.

Ang hepe sa kapolisan sa maong lungsod nga si Insp. Dexter Basiergo milusad og buybust operation batok sa suspek nga miresulta sa pagkasikop niini.

Dihang gikapkapan ang suspek nakuhaan pa gyud kini og laing duha ka pakete sa iyang posesyon ug kwarta nga P440 nga gituohang halin sa pagpamaligya og ginadiling drugas. Matud ni SPO1Centino dugay nang nabutang sa ilang watchlist ang suspek ug taud taud sab nila kining gi-surveillance ug gisuwayan og sikop apan idlas kini kaayo.  (BANAT NEWS)