CEBU, Philippines - Nagkahiusa kagahapon ang mga opisyal ug mga kawani sa city hall ug mga barangay kapitan sa dakbayan sa Mandaue sa pagtabang og panday sa mga balay sa mga gipabalhing mga molupyo ngadto sa relocation site sa Pacnaan, sa maong dakbayan.
Kini pinaagi sa ilang programa nga “Pasko sa Pagtinabangay alang sa Inyong Panimalay.”
Nagsugod ang maong kalihokan human sa flag raising sa alas 8:00 sa buntag ug gitapos atol sa tingpaniudto diin silang tanan nagsawo og pangaon didto sa maong dapit.
Si Mayor Jonas Cortes maoy nangulo sa mga kawani sa kagamhanan sa maong dakbayan, si Bise Mayor Glenn Bercede maoy nangulo sa mga sakop sa konseho sa dakbayan ug si Association Barangay Council (ABC) Federation President Ernie Manatad mao usab ang nangulo sa mga barangay kapitan.
Sa iyang pamahayag si Cortes miingon nga ang pagsaulog sa Pasko makabaton og kahulogan pinaagi sa pagtinabangay ug panaghiusa sa tanan.
Uban sa kagatosan ka mga membro sa urban poor, ang grupo sa mga opisyal ug kawani sa kagamhanan nanghawan ug mitabang og bayong sa gilawong nga mga balay ngadto sa maong lugar.
Gawas sa gitunol nilang hinabang pinaagi sa ilang kusog, ang grupo nanghatag usab og mga pinaskohan nga balde nga gisudlan og bugas, linatang pagkaon, noodles ug uban pa ngadto sa mga urban poor sa dakbayan nga gikan sa danger zone area. (WC)(BANAT NEWS)