Pilipinas may abundang pagkaon

CEBU, Philippines - Ang nasud makabaton na unya og abundang pagkaon  sumala pa ni Department of Agriculture Secretary Proceso Alcala atol sa bag-ohay pa niyang  pagduaw dinhi  sa Sugbo.

Sumala pa ni Alcala nga sa katapusang ani, ang yutang gitamnan og kahumayan sa nasud naghatag gayud og taas nga produksyon tungod kay wala gayud kini maapektahi sa ting-uwan  kay  sayo  man  kining gipananom.

Gipadayag usab ni Alcala nga ang mga magsisibya sa estasyon sa radyo nahimong instrumento  o kasangkapan  tungod sa paspas nga paghatod og impormasyon kalabot sa teknolohiya nga gigamit sa produksyon sa kahumayan   ug gidasig   ang  mga mag-uuma sa pagsagop sa malahutayong pagpanguma.

Aron sa pagpalig-on sa kusog sa ahensya sa agrikultura, si Secretary Alcala mihatag og direktiba aron sa pagtuon sa posibleng  panaglambigit  sa Philippine Foundation of Rural Broadcasters (PFRB) nga gipangulohan ni Louie Tabing alang sa   katukoran sa estasyon sa radio sa komunidad  kon ‘community radio ‘sa   mga  dapit  sa  kaumahan  nga  dili na maabot  sa signal sa mga radio  nga tag-as og  frequency. Gipasabot  sa  kalihim sa agrikultura  nga  an g community radio   dako  na  kaayo  og ikatabang  sa  mga  mag-uuma  sa usa  ka  lugar   nga  dili  na  maabot  og  sibya  sa mga  tradisyonal  nga  sibyahanan, sanglit  mao  kini  ang  mosabwag  sa mga balita  bahin sa panguma    nga mugna  sa  mga  tinubdan  sa  ahensya  sa agrikultura.

Apan matud pa  ni  Alcala  nga  dili lang kay  bahin sa panguma  ang  ikasibya  sa community radio kundi  bisan  ang bahin  sa pangisda,  busa  mimando  siya  sa  mga  kadagkoan  sa Department of Agriculture (DA)  sa matag  rehiyon  nga  mopahigayon  og  survey  aron  kadtong mga lugar nga wala  pa kataroki  og  community  radio,  mapatukoran  na  aron  labing  maatiman   ang panguma  ug  panagat  sa mga  molupyo  sa maong  mga  dapit.

Gibutyag usab ni Alcala nga ang nasud kasamtangang nakigkontrato  sa  mga  negosyante  sa  nagkalainlaing  nasud  sa gawas  aron maoy  modawat  sa mga mahalong klase  sa bugas humay  nga  gikan dinhi  sa Pilipinas  ug  itumod   ngadto  sa gawas.

Matud  pa  ni Alcala  nga pipila  sa mga  nasud  karon  nga  gikontrata  sa  kagamhanan  nga  modawat  sa bugas  nga  Pilipinhon  mao  ang Middle East. Miingon  ang kalihim  sa agrikultura   nga  giandam  na  niini  ang  organiko  ug  de kolor  nga  bugas  humay  nga maoy  ihandos  ngadto  sa Middle  East.

Matud  pa  niya  nga  mahalon  kining  matanga  sa bugas busa  mao  kini  ang  angay  ibaligya  ngadto  sa gawas  kay  ang  mga  Filipino  naanad  man  sa pagkonsumo  sa  ordinaryong  matang  sa bugas nga  maoy  abunda  kaayo  dinhi  sa nasud  sugod  sa umaabot  nga  tuig 2013. (Liezl Mabini Frasno /WC) (BANAT NEWS)