CEBU, Philippines - Pag-ampo ug maayong relasyon ngadto sa Kahitas-an ug dili importante ang materyal nga panginahanglan sa tawo. Kini maoy mensahe ni Archbishop Emeritus Ricardo Cardinal Vidal atol sa unang Misa de Gallo kagahapon nga gihimo diha sa kapilya sa Cebu Catholic Television Network (CCTN).
Atol sa wali ni Cardinal Vidal subli niyang gipahinumduman ang katawhan nga ang katapusang mohukom sa tawo mao ra gyud ang Labaw’ng Makagagahom.
Matod pa ni Cardinal Vidal nga unsaon man ang material nga butang kun ang pagsalig ug pag-ampo kulang tungod ang materyal nga butang dili tanang higayon swerte ug kalipay ang ihatag kundili hasta problema.
“The material part on the other hand, is the most expensive, but the least beneficial. The material part can in fact be ruinous and harmful, considering that you can start the year in financial trouble or hospitalized for high blood pressure,” pasabot pa ni Cardinal Vidal.
Samtang gihulagway ni Vidal nga kulang ang diwa sa Pasko kung pulos lang mga gasa, kwarta ug uban pang materyal nga panginahanglan ang sukdanan sa usa tawo.
Sama sa gipaabot, nagsugwak ang mga tawong nanimba sa unang adlaw sa Misa de Gallo sa nagkadaiyang mga simbahan sa Sugbo. Ang kapolisan namutang og mga police assistance centers aron kadangpan sa publiko kung may mga kakulian.
Ang hepe sa kapolisan sa dakbayan sa Sugbo nga si Sr. Supt. Melvin Ramon Buenafe mipaday’g nga walay nahitabong krimen atol sa unang adlaw sa Misa de Gallo
Sa dakbayan sa Talisay, malinawon ug wala’y mga krimen nga natala ang kapolisan sumala pa ni Inspector Rio Hugo Ipong nga nahinabi sa Banat News kalabot sa mga tawong nanimba diha sa Saint Joseph Parish sa Tabunok, San Isidro Labrador Parish sa barangay San Isidro, Santa Terese de Avila Parish sa barangay Poblacion.
Samtang sa siyudad sa Lapulapu, gidagsa usab ang labing unang Misa de Gallo alang sa siyam ka adlaw nga novenaryo sa dili pa ang Pasko sa pagkatawo ni Hesukristo.
Ang mga dagkong simbahan sa Lapulapu sama sa Nazareno Parish sa Brgy. Mactan, Mother of Perpetual Help sa Brgy. Babag, Sacred Heart of Jesus and Mary sa Brgy. Marigondon ug ang Birhen sa Regla National Shrine gihugupan sa mga Katoliko.
Matud pang Fr. Jaime Duero, ang Kura Paroko sa Birhen sa Regla National Shrine lahi ang pamaagi nga gisubay sa mga Katoliko dinhi sa nasud sa pagsunod sa Misa de Gallo diin ang mga tawo manimba dili gabii kondili kaadlawon dili parehas sa ubang nasud.
Susamang talan-awon usab ang mga manimbahay sa mga simbahan sa dakbayan sa Mandaue kagahapon nga malinawong natapos nga walay mga dautang panghitabo nga natala ang kapolisan.
Adunay mga polis nga gipakatap sa palibot aron magbantay batok sa mga mapahimuslanon.
Ang mga Filipino adunay mga pagtuotuo nga kung makompleto sa usa ka tawo ang siyam ka gabiing Misa de Gallo ihatag sa Kahitas-an ang ilang gipangayo. (Lesley Caminade, Brenda Batuto, Bong Soriano ug Romeo Limpangog/EIM) (BANAT NEWS)