CEBU, Philippines - Nagtingkagol karon ang usa ka 32-anyos nga drayber sa traysikad human kini miunay og molestiya sa iyang 12-anyos nga anak ug gikulata pa ang laing 11- anyos nga anak nga manghud sa biktima niadtong Sabado sa kaadlawon.
Ang insidente nahitabo diha sa usa ka barangay sa lungsod sa Asturias samtang nangatulog ang mga biktima. Ang suspek nagtingkagol na sa karsel sa kapolisan tungod sa maong krimen.
Sumala pa PO2 Cesar Climaco, ang desk officer sa Asturias Police Station dihang nahinabi sa Banat News ang magsuong biktima nangatulog pa niadtong tungura tupad ang lain pang duha nila ka mga manghud diha sa salog.
Ang suspek nga gikatahong gikan nakig-inom sa mga barkada hubog nga nauli ug sa pagsulod niini sa balay daw nayawaan kini ug gituparan ang 12-anyos nga dalagitang anak ug gimolestiya kini. Ang biktima nga nakamata sa gibuhat sa amahang nagbiga kalit nga misinggit hinungdan nga nakamata ang 11-anyos nga manghod ug ang duha naggakos nga naghinilakay.
Imbes nga mahuwasan sa iyang dautang nabuhat ngadto sa anak iyaha hinuong gikulata ang 11-anyos. Tungod sa kahubog nakatulog ang suspek ug dihadiha nanggawas ang managsuon ug midangop sa ilang iyaan ug misumbong sa mga polis.
Ang suspek nadakpan kagahapon na sa buntag samtang natulog sa iyang traysikad.
Dugang nahipos sa kapulisan nga ang asawa sa suspek ug inahan sa mga biktima usa ka bulan pa lang gikan namatay tungod sa sakit. (Darrel A. Carumba/EIM) (BANAT NEWS)