Sunog sa Lapu’ P1.6M ang danyos

CEBU, Philippines -  Mokabat sa P1.6M nga kantidad ang danyos sa sunog nga nahitabo sa sitio Suba-Masulog, barangay Basak, dakbayan sa Lapulapu alas 8:25  ang takna sa miaging gabii nga nakaingon sa pagkaugdaw sa siyam ka panimalay, duha ka PUJ nga pasaheroan, usa ka traysikol ug usa ka motorsiklo.

Si SFO1 Agapito Bolutano, imbestigador sa kabomberohan sa maong dakbayan nga nahinabi sa Banat News miila  sa mga tag-iya sa panimalay nga nasunog mao sila si Dominga Potot, Estrelleta Potot, Camilo Manayon, Edion Manayon, Willy Senoron, Frico Piscador, Arlene Bayo, Mateo Degamo, Alvis Potot ug Felicidad Bababatoan. Matud pa  lakip usab sa nasunog ang storage shop nga giokupar ni Carlos Baay nga mao usab ang tag-iya sa nasunog nga duha ka PUJ, usa ka traysikol ug motorsiklo.

Si  Bolutano miingon nga ang kalayo  nagsugod sa lawak  sa ikaduhang andana sa panimalay ni Dominga Potot ug dali kining mitapon sa mga panimalay nga sikbit niini.

Ang mi-over hit nga airconditioning unit maoy nakaingon sa maong sunog tungod kay kalit kini miboto nga nagmugna og kalayo ug dali nga mikatap sa tibook panimalay ni Dominga Potot ug mitapon ngadto sa mga sikbit nga kabalayan.

Dugang pa niya pulos ginama sa light materials ang maong mga panimalay nga nasunog nga ilang gipaubos sa 3rd alarm nga maoy hinungdan sa pagtubag usab sa uban nga kabomberohan sa dakbayan nga naglakip sa MEPZA, Philippine Air Force ug Emergency Rescue Unit Foundation (ERUF) nga maoy nagtinabangay sa  pagpawong sa kalayo.

Gitataw ni Bolutano nga ang ka gamay sa dalan sa maong lugar maong nalangan sila sa ilang pagpasirit og tubig tungod kay gisumpaysumpay pa man nila ang ilang hos hangtod nga nakaabot kini sa maong dapit.

Giklaro niya nga atol nga nahitabo ang maong sunog walay naangol o nakalas nga kinabuhi. (EIM)(BANAT NEWS)