CEBU, Philippines - Magtiayong polis ug mga ginikanan niini ug drayber sa traysikol ang naangol human ang ilang mga sakyanan aksidenteng nabundolan sa usa ka Isuzu truck fish car kagahapon sa alas 11:00 sa buntag diha sa national highway sa barangay Tapun, lungsod sa Dalaguete.
Ang mga naangol mao sila si SPO1 Peter Isidro Jr., asawa niining si SPO1 Maria Fay Isidro nga parehong nadestino sa Dalaguete Police Station ug ang ilang ginikanan nga sila si Estella ug Segundo Gonzales, pulos nagpuyo sa barangay Casay, Dalaguete.
Laing naangol mao ang drayber sa traysikol nga si Nian Caren, 26, taga barangay Cawayan, Dalaguete.
Ang drayber sa truck nga mibangga sa mga biktima mao si Rogelio Moricho, 54-anyos taga Pagadi-an City, Zamboanga del Sur.
Si PO3 Alan Sanoy nga nahinabi sa Banat News kagahapon mibutyag nga ang magtiayong polis uban sa ilang mga ginikanan sakay sa Suzuki Chariot multicab gikan sa ilang balay paingon ngadto sa lungsod.
Apan pag-abot nila sa maong dapit giingon mi-overtake ang trak sa mga biktima apan nasaghiran ang sakyanan sa mga biktima ug nalahos sa sementadong paril.
Samtang ang trak nabangga sa traysikol ni Caren kinsa niadtong higayona nagpakanaog og pasahero.
Gawas kang Estella kinsa nasunggo ug giobserbahan pa sa doktor sa Alcantara District Hospital ang ubang mga biktima wala hinuon kini makaangkon og grabeng kadaot sa ilang lawas.
Si Moricho natingkagol karon sa Dalaguete detention cell. (BANAT NEWS)