South District nagsugod na og bukal

CEBU, Philippines - Gihagit ni Konsehal Rodrigo “Bebot” Abellanosa ang iyang kaatbang sa politika nga si Atty. Aristotle Batuhan sa pagbarog aron maoy mangunay sa pagpasaka og kaso batok kaniya.Gipadayag kini sa konsehal human sa pagpasaka og kaso sa usa ka Phillip Banguiran batok kaniya nga gidudahan ni Abellanosa nga gipaluyohan ni Batohan.

Kahinumduman nga gireklamo ang konsehal tungod sa kalapasan sa anti-graft and corrupt practices act nga gipasaka ni Banguiran ngadto sa buhatan sa Ombudsman Visayas.Gihulagway ni Banguiran nga dunay conflict of interest ang pagkalakip ni Abellanosa sa scholarship committee sa siyudad sanglit tag-iya man usab kini sa Asian College of Technology.

Ang siyudad aduna pa karoy bayrunong P60 milyones alang sa mga scholars sa siyudad nga nagtungha diha sa ACT.Si Batohan ug Abellanosa maoy mag-atbang sa south district sa pagka-kongresista karong 2013 Elections.Matud pa sa konsehal nga gihimo lang instrumento ni Batuhan si Banguiran aron maoy mopasaka og kaso batok kaniya.Gihulagway ni Abellanosa  nga desperado na si Batuhan ug mao na lang kini iyang nahunahunaan aron dauton ang iyang pagkatawo.Apan si Batuhan  kusganong mihimakak sa alegasyon ni Abellanosa nga siya maoy utok sa maong kaso.

Gitambagan hinuon ni Batuhan si Abellanosa nga tubagon na lang ang maong pasangil sanglit usa man kini ka lehitimong reklamo ug aron maklaro sa katawhan ang iyang baruganan. (/EIM) (BANAT NEWS)