Bala miungot sa baba

CEBU, Philippines - Nabuslot  ang aping  ug  miungot  ang  bala   sulod sa baba sa usa ka  lalaki human  pusila  sa  usa  ka  wanted  nga kriminal didto  sa barangay Biasong, dakbayan sa Talisay, niadtong Martes sa udto.

Apan  ang biktima   nga  si Roberto Villaver, 43, residente  sa maong dapit, nakabawos usab pagpusil sa  namusil  kaniya  nga si Alexander Abendan, 27, nga iyang silingan  kinsa  misakuong  human  masabak  sa bala  ang  tuong tiil  niini.

Si Abendan kinsa wanted ug  adunay   pending  nga warrant of arrest sa kasong homicide nasikop dayon sa Motorcycle Riding Unit (MRU) ug Mobile Patrol Group (MPG) sa Cebu City Police Office (CCPO) human sa maong  hitabo ug   mitugyan  kang Abendan  ngadto  kanila  ni SPO4 Daniel Tarucan ug  mga kauban  sa Talisay City Police Station. 

Si SPO4  Tarucan,  mibutyag sa Banat News    nga sa miaging semana gipusil ni Abendan  si Villaver  apan  wala  kini  maigo.

Kini  sa dihang  milaban  si Abendan  sa  iyang  higala  nga  gikaaway  ni Villaver  sa maong  higayon.

Tungod  kay  misumbong  si Villaver  sa  kapolisan, misamot  kasuko  si Abendan  kaniya  busa  dihang  nagkaabot  sila  niadtong Martes  sa udto, giluthang  niini si Villaver.

Apan  bisan  samdan sa aping kansang  bala  nga  wala hisayri  ang kalibre miungot  sa sulod  sa iyang baba, nakabawos  pa  si  Villaver apan  gumikan  kay  dili hingigo  og  lawas, tiil  ra  ni Abendan  ang  napisok  sa bala.

Apan           alas 6:00 na sa gabii  nadakpan  si Abendan  sa  mga  otoridad  sa MRU ug MPG  nga nagsakay    og taxi paingon  sa tambalanan busa  gihatud na lang  nila kini ngadto  sa  Cebu City Medical Center (CCMC)  aron matambalan  ang samad  niini  sa tiil.

Sumala  ni Tarucan nga si Abendan  may  kaso  sa pagpamusil  sa iyang  silingan, gawas  sa giingong pagkalambigit  niini  sa  pagpanulis  sa  Talisay  apan  gumikan  sa kahadlok, wala  mosumbong  sa kapolisan  ang  mga  biktima.

Si Villaver kasamtangang  na-admit  sa Vicente Sotto Memorial Medical Center  sa dakbayan  sa Sugbo diin gikuha  ang  bala  nga miungot  sa iyang baba, samtang  si Abendan  napaslak  na  sa prisohan sa Talisay aron atubangon  ang iyang  kaso. (/WC)(BANAT NEWS)