CHR nag-inspeksyon
CEBU, Philippines - Ang Commission on Human Rights (CHR)-7 mipahigayon og inspeksyon sa nagkadaiyang prisohan, detention cells sa kapolisan aron pagpangutana sa mga inmates kung sila gi-torture ba sa mga awtoridad.
Usa ka team nga anaay upat ngadto sa lima ka mga miyembro ang mipahigayon sa inspection nga nagsugod sa miaging semana ug lakip sa napahigayunan og inspeksyon mao ang lungsod sa Compostela, Carmen, Sogod, ug Catmon.
Gawas sa mga priso gisusi usab sa CHR-7 kung kompleto ba og pasilidad ang mga prisohan sama sa tubig kasilyas, limpyo ug may pagkaon ang mga priso. Lakip usab sa gitan-aw kung sakto ba ang paagi sa pagdakop sa mga priso.
Si Atty. Alejandro Alonso Jr., CHR-7 director, mibutyag nga ang pagmonitor sa karsel paagi usab nga masuta nila kung aduna bay piniriso nga gihikawan sa ilang katungod.
“Torture is committed in places where persons are deprived of their rights which are prohibited in the Anti-Torture Act of 2009,” matud ni Alejandro Alonso Jr. ang director sa CHR-7.
Base sa Anti-Torture Act of 2009 RA 9745, ang tanang tawo, suspek, bilanggo respetuhon, walay tawo nga gipailawom sa imbestigasyon o gikostudiya sa mga awtoridad nga pasakitan ma- physical man, mental, hulga, paghasi o bisan unsang buhat nga makababag na sa iyang kagawasan o ba kaha makapauwaw sa iyang dignidad. (BANAT NEWS)
- Latest
