Anak misawo sa kutsilyo angol

CEBU, Philippines - Bayanihon kaayo ang nahimo sa usa ka 10-anyos nga batang lalaki nga misalo sa kutsilyo pagdunggab sa iyang amahan ngadto sa iyang mama niadtong Sabado sa gabii diha sa barangay San Isidro, dakbayan sa Talisay.

Base sa blotter sa kapolisan sa Talisay una pa ang pagkasamad sa bata, gibun-og sa amahan niini ang iyang 36-anyos nga inahan tungod sa paglaban sa kinamaguwangan niining anak nga nag-edad og 17-anyos. Sumala pa nga ang 17-anyos anak sa ginang sa una niining bana wala hinuon matino pa kung unsay hinungdan sa kasuko sa 36-anyos nga suspek nga ama-ama niini.

Base sa imbestigasyon sa kapolisan miuli nga hubog ang suspek kinsa nagtrabaho sa usa ka construction site ug giingong gipanghasi ang iyang pamilya ug gihulga ang 17-anyos nga hinablos nga iyang patyon.

Tungod niini nasuko ang inahan sa mga bata ug milaban apan mao kini ang gikulata sa suspek hinungdan sa bun-og niini sa mata ug wala pa gyud matagbaw gikatahong mikuha og kutsilyo ang suspek ug gihansakan ang ginang.

Apan gisalo sa 10-anyos ang kutsilyo aron kini pugngan apan gibira sa suspek ang maong hinagiban hinungdan sa dakong samad sa bata hinungdan nga nanagan ang manag-inahan padulong sa police station.

Sila si PO2 Roy Lofranco, PO2 Romualdo Torregoza ug PO1 Euwen Pitogo midakop sa suspek ug gikatakdang pasakaan kini og kasong kalapasan sa Akta Republika 7610 o Child Abuse  ug “Violation Against Women and Children. (Brenda D. Batuto/EIM)

Pagbalhin og relihiyon maoy nakaingon sa kapildihan ni Manny?

Nila ni Edwin Ian Melecio, Bong Soriano

Daghang mga boxing fans ni eight- division champion Manny "Pacman" Pacquiao ang nakabantay nga dili na kini manguros ug wala na usab kini magsuot pa og rosaryohan ibabaw sa ring nga maoy nakapaila og maayo sa Filipino boxing icon nga usa ka relihiyosong Katoliko.

Kini maoy obserbasyon sa mga fans ni Pacquiao. Bisan tuod og dili kini makatarunganon nga rason sa duha ka nagsunod nga kapildihan nga iyang nahiaguman.

Gani ang mismong inahan ni Pacquiao nga si Dionesia “Mommy D” mibati usab og kasagmuyo sa pagbalhin og relihiyon sa iyang anak atol sa usa ka interbyu sa GMA-7 pipila ka minutos human sa sangka ni Pacquiao ug Mexican champion Juan Manuel “Dinamita” Marquez.

Dominante ang Romano Katoliko dinhi sa Pilipinas maong ang kinabag-ang duot sa fans ni Pacquiao pulos mga Romano Katoliko maong dili gyud kalikayan nga matutukan ang matag lihok sa ilang idolo ibabaw sa ring.

Pipila ka mga nakatan-aw pay-per-view ang mipasiaw pa gani sa pag-ingon nga ma-knockout gyud si Manny tungod kay ang rosaryohan ug ang pagpanguros nga usa sa mga gimbuhaton sa mga katoliko ug maoy naandan nilang makita kang Pacquiao sa matag away niini wala na nila makita pa.

Sa maong away wala na manguros sa matag rounds si Manny, hinuon wala gihapon kalimti ni Manny ang pag-adto sa iyang korner aron mag-ampo.

Si Dionisia Pacquiao wala makapugong sa kaugalingon sa interbyu kaniya sa GMA News TV miingon nga sukad nga mibalhin si Pacquiao og relihiyon daw gisamokan na kini sa mga pastor nga magsige og anha sa balay ni Manny.

Matud pa niya maminaw hinuon gihapon si Manny kung iyang sultihan apan ‘makulit’ ang mga pastor. Daw nagmahay si Dionesia nga namalhin ang magtiayong Pacquiao og laing relihiyon, matud pa niini. "Ang nakapag-champion sa anak ko, ang dati niyang relihiyon na pinanggalingan niya," matud pa ni Dionesia sa interview ni Mark Salazar sa GMA News TV.

Hinuon kung dunay nagtuong ang pagbiya sa relihiyon ang hinungdan, duna say nagtuong dili kini rason aron mapildi si Manny.

“Bisan kapila pa ka manguros, kung ma-taymingan ka pildi gyud ka. Ang personal man na nga relasyon sa tawo didto sa Ginoo ug dili ang relihiyon,” sumala pa sa usa sa mga fan ni Pacquiao sa usa ka pundok sa mga tumatan-aw sa daplin sa dalan diha sa barangay Hipodromo sa dakbayan sa Sugbo.

Hinuon dako ang mga maayong kausaban nga nakita sa lifestyle ni Manny human kini mibiya sa pagka-Katoliko, dili na siya moinom, sugal ug uban pa.

Daan nang nanganti ang duha ka boksidor nga selyohan nila ang panagribal pinaagi sa usa ka knockout.  Aron makabawi, upat ka bulan nga nag-training si Marquez samtang si Pacquiao nadelatar sa iyang training didto sa Wild card Gym sa U.S. tungod sa ka-busy sa umaabot nga eleksyon ug sa General Santos nalang kini nagsugod og training nga wala ang hall famer coach niyang si Freddie Roach. (Edwin Ian Melecio, Bong Soriano ug report gikan sa GMA News Online) (BANAT BALITA)