Rematch sa ikalimang higayon

CEBU, Philippines - Daghang nagtuong miabot na ang senyales alang ni Filipino boxing icon Manny Pacquiao nga hingpit na niyang isagbay ang iyang boxing gloves ug mobiya na sa kalibutan sa boxing. Kadiyot nga naputos sa kahilom ang tibuok nasud human wa damha sukad-sukad ilang makitang ang giilang ‘Pambansang Kamao’ ug Filipino boxing icon nga si Manny Pacquiao nga magkulob ug walay panimuot ibabaw sa ring.

Nahugno ang mga boxing fans dihang gi-knockout ni Mexican boxing superstar Juan Manuel Marquez si Pacquiao sa dayung tapos sa sixth round kagahapon didto sa MGM Grand Garden Arena sa Las Vegas. Sama sa giatangan, nahimo na usab nga kulbahinam ang sangka sa duha diin isog nga nagsinukliay og mga kinumo ang duha ka magkaribal nga boksidor.

Gituman ni Marquez ang iyang saad nga tumbahon si Pacquiao, apan sa wa pa kini, unang mipakita og kaagresibo si Pacquiao sa first round.

Gamit ang mas maskulado og daku niya nga lawas, gipakita ni Marquez ang iyang kusog pinaagi sa pag-knockdown ni Pacquiao sa third round gamit ang usa ka counter-hook.

Nakabarog si Pacquiao ug mibawos sa fifth round diin iya usab nga gipayaka si Marquez kinsa nakahiagum usab og buak nga ilong.

Base sa statistics nag-una na si Pacquiao sa puntos niadtong tungura, apan wa niya mabantayi ang laing counter right hook ni Marquez nga maayong pagkatugpa sa iyang nawong sa hinapos nga segundo sa round six. Nalup-og si Pacquiao ibabaw sa ring ug taod-taod usab kini mabaliki sa panimuot.  “I trained hard for four and a half months for this fight, finally I showed that I am the stronger and faster fighter,” matud pa ni Marquez dihang gi-interbiyu siya human sa away.

Sa opisyal nga stats sa away sa wala pa ang knockout, nakita nga naglabaw si Pacquiao diin mipasulod siya og 94 ka kinumo sa 256 niya ka mga tira, samtang si Marquez aduna lay 52 ka kumo nga napatama sa 246 ka kumo nga iyang gilabay.

Si Pacquiao nagkanayon nga kun adunay kahigayunan sa fifth match, dili siya magduha-duha pagdawat niini aron usab mabawi ang iyang dungog. Apan sa misunod nga interbyu kaniya ni Pia Arcanghel sa GMA-7 human makagawas sa mandatory medical checkup si Pacquiao miingong “wag na muna nating pag-usapan ‘yan.”

“He got me, a good shot. That’s boxing. Sometimes you get hit,” matud pa niya.“After a few months back to training. Back to fight. It’s up to my promoter,” matud pa niya sa sayo pa.

Ang Top Rank Inc. CEO nga si Bob Arum namahayag usab nga dako og posibilidad nga adunay rematch, apan sayo pa kaayo nga hisgutan kini, ilabi na nga nabutang sa makuyaw nga kahimtang si Pacquiao.

“Why not? This fight will go down as a ring classic,” segun pa ni Arum kinsa migakos sa kapikas ni Pacquiao nga si Jinkee kinsa wa kapugngi nga makahilak sa kahingawa ngadto sa iyang bana.

“Manny says he wants to keep fighting,” matud pa ni Arum sa interbyu kaniya sa boxingscene.com.

“Listen, I don’t think there was one person, whether on television or here, who saw that fight tonight, that wasn’t just blown away,” matud pang Arum. “And if there’s a demand for a fifth fight and the guys want to do it again, what better fight can you make?”  dugang pa sa promoter. Si Pacquiao gidala sa tambalanan didto sa Las Vegas aron usab ipatan-aw kung wala bay grabeng kadaot nga nahiaguman ang iyang ulo human sa ngil-ad nga knockout, wala una siya tuguting makatulog aron maobserbahan.Nakadawat usab og managlahing reaksyon gikan sa mga Cebuano ang resulta sa away ni Pacquiao.

“Ganahan ko nga naa'y fifth fight  tungod kay dominado na gyud unta to ni Pacman ang away. Nadakpan lang jud siya ug patyanan sa mga walhon which is the straight right hand,” matud pa sa dakung boxing fan ni Pacquiao nga si John Jhul Bontes. Ang Japanese-based Cebuano boxing trainer nga si Regie Campos nangayo usab sa pagsabot sa mga boxing fans sa kapildehan ni Pacquiao.

“Bisag pilde si Pacquiao kinahanglan naa gihapon siya sa atong kasing-kasing tungod sa dungog nga iyang gihatag sa nasud,” sigun pa niya. (Lemuel Maglinte/EIM)-Dugang estorya sa Banat Sports (BANAT BALITA)