CEBU, Philippines - Namatay ang usa ka 63-anyos nga lolo human kini madakin-as ug maayong pagkapantok sa ulo niini sa gitapok nga mga bato samtang siya nanghayhay og linabhan niini sa sitio Tubigan sa barangay Dawis Sur sa lungsod sa Carmen niadtong Huwebes sa alas 10:50 sa buntag.
Ang patay nang nadangat sa tambalanan mao si Roberto Salmoso Pahilangko, 63, molupyo sa nahisgutang lugar.
Matud ni PO3 Ronald Wahing sa Operations Branch sa Cebu Police Provincial Office base sa spot report gikan sa Carmen Police Station si Pahilangko nanghayhay kini sa iyang mga sinina nga gilabhan niadtong tungura.
Apan aksidenti kining nadakin-as dihang nakatunob sa basa nga bahin sa semento ug wala na makabalanse og maayong pagkalamba.
Demalas kay napantok ang ulo niini sa gipundok nga mga bato ug patay na pag-abot sa Danao City District Hospital. (BANAT NEWS)