Gwardiya gipatay
CEBU, Philippines - Patay nang nakit-an ang gwardiya nga nagbantay sa National Power Corporation (NPC) ug may samad dinunggaban ug gihiwa pa ang nawong niini diha sa staff house sa maong ahensya sa barangay Talavera siyudad sa Toledo kagahapon sa alas 6:00 sa buntag.
Ang biktima mao si Gerson Sanchez, 23, gwardiya sa Adjelex Security Agency ug diha nadestino sa staff house sa NPC.
Matud ni SPO4 Carmelito Hornales ang desk officer sa Toledo City Police dihang nahinabi sa Banat News ang house keeper nga si Renato Enggaling nga kauban sa biktima maoy nakadiskubre sa biktima nga nag-ubo na sa lamesa nga naglunang sa dugo ug dunay mga samad dinunggaban.
Daling gi-report ni Enggaling sa kapulisan ang nahitabo ug diha na nasuta sa kapolisan nga dunay samad dinunggaban sa tiyan ug gihiwa ang nawong sa biktima. Nawala usab ang service firearm niini nga 9mm pistol.
Sa gihimong pagsukit sukit sa kapulisan ngadto ni Enggaling gitug-an niini nga ang biktima nagkabangi kini sa ilang kauban nga house keeper nga si Alspeed Allecer, 21, nga niadtong miaging adlaw lang mi-resign sa trabaho sa wala pa matino nga hinungdan.
Ang kapulisan daling miadto sa pinuy-anan ni Allecer apan wala na kini igkita sa ilang lugar.
Si SPO3 Henry Acosta, Toledo City investigator sa linaing pakighinabi sa The Freeman mibutyag nga si Allecer ug Sanchez nagkabangi human masakpi si Sanchez ni Allecer nga nagdala og babaye sa ilang trabahoan usa ka buwan na ang nakalabay.
“Gibaharan man ni Sanchez si Allecer nga dili pasabaon kay nasakpan man nga nagdala og babaye sa staff house,” matud pang Acosta.
Si Enggaling padayong gikustodiya sa kapulisan alang sa dugang impormasyon sanglit sila lang duha ug ang biktima ang nag-duty sa maong lugar dihang nahitabo ang krimen. (BANAT NEWS)
- Latest
