Nagpapolis-polis nadakpan sa tinuod nga polis

CEBU, Philippines -  Nagtingkagol sa karsel ang usa ka lalaking nangangkong polis ug mipakita pa og tsapa human masutang dili lisensyado ang armas niini ug migamit og blinker atol sa gihimong checkpoint sa Land Transportation Office diha sa Nasipit, Talamban pasado alas-8 sa buntag kagahapon.

Ang nasikop mao si Romeo Torres Jr. kinsa nakuhaan og kalibre .45, duha ka magazine, 16 ka buhing bala ug usa ka  police badge.

Matud pa ni Francisco Ouano sa Land Transportation Office-7 nga ilang nakit-ang nag-blinker si Torres hinungdan nga ila kining gisita. Sumala pa ni Ouano nagpaila dayon si Torres nga kini usa ka polis apan dihang gipangitaan og dokumento tsapa lang ang gipakita niini hinungdan nga wala siya palakwa sa mga ahente sa LTO.

Apan paglabay sa pila ka minutos miangkon si Torres nga sakop siya sa barangay intelligence network ug tawo usab sa usa ka mayor sa amihanang bahin sa lalawigan sa Sugbo.

Naatol usab nga maoy pag-agi sa police nga si PO3 Rene Remedios diha sa lugar kinsa padulong na untang mo-duty sa Camp Sotero Cabahug ug gisangpit sa mga sakop sa LTO.

Matud pa sa hepe sa Cebu City Public Safety Battalion nga si Supt. Reycel Carmelo Dayon posibleng pasakaan nila og kasong illegal possesion of firearms ug usurpation of authority si Torres.  (BANAT NEWS)