Fastcraft nalunod, state of calamity gideklarar sa Siquijor

CEBU, Philippines -  Gideklarar sa probinsya sa Siquijor nga ipailawom sa state of calamity ang lalawigan gumikan sa kinabuhing nakalas ug nangagubang kabtangan sa bagyong Pablo samtang usa ka fastcraft sa maong lalawigan nga misuway unta og tago gikan sa bagyo ang nalunod, hinuon luwas ang tanang tripulante niini.  Sumala pa ni Provincial Disaster Risk Reduction and Management Council (PDRRMC) executive director,  Arturo Pacatang,sa interbyu sa The Freeman (igsuong pamantalaan sa Banat News) ang desisyon nakab-ot gumikan sa nakitang kadako sa danyos sa mga pananom, kabalayan sa nagkadaiyang lungsod.

 Usa ka Helbert Daniel, nga taga SitioCang-uran, Cangomantong, Lazi ang nakalas dihang  natumbahan og punoan sa kahoy samtang kini nahiagi sa Sitio Ginsayawan, Gabayan sa lungsod sa Lazi, Siquijor.

Samtang sa pantalan sa Larena, wala tuguti nianang mga adlawa nga makalawig ang mga barko ug duha niini ka mga fastcrafts nga wala makapahiluna sa pantalan ang mibiya ug mitago sa Liloan, Cebu sumala pa ni PO1 Guillermo Bahandi, ang hepe sa Coast Guard detachment sa Larena, Siquijor.

Matud pa niya walay clearance gikan sa ilang buhatan ug ang Delta 1 nga usa sa mga fastcrafts padayon pang gipangita. Giingong misuway unta pagtabang ang Delta 1 sa Delta 3 nga naaberya sa lawod apan hangtud ning pagbalita wala pa igkita ang maong fastcraft.

 Sumala pa nga dunay onse ka tripulante ang Delta 1, lima niini atoa sa Larena Port Terminal matud pa ni Port In-Charge Marie CharisTatoy. Usa sa mga tripulante mao si Gary Bolibol, 26, taga Toril, Davao City kinsa nabalian sa iyang tuong bitiis human mapiit sa fastcraft samtang naghikot sa pisi.

Samtang ang unom pa ka mga tripulante nga misuway og rescue sa Delta 3 naluwas gihapon nga naglakip sa ilang kapitan nga si Captain Neil Abe nga taga Taculing, Larena, Siquijor; RD Johnly Oring nga taga Panabo, Davo del Sur; Jake Kilat nga taga Siaton, Negros Oriental; Marcmil Serdeniola nga taga Esmeralda, Balongoa, Pangasinan; Vincent Sobremisana ug Rene Dela Peña pulos taga San Jose, Negros Oriental.

Sumala pa nga sila si Abe ug Oring naluwas sa mga mananagat sa Canlambo, Larena samtang sila si Kilat, Serdeniola, Sobremisana ug Dela Peña naluwas sa PL 480 craft sa Siquijor matud pang Chita Maglinte.

Samtang usa ka barko nga mao ang MV Euro 3 nga iya sa Villa Shipping Lines ang nabanlas sa baybayon sa lungsod sa Maria, aduna kini 16 ka tripulante ug usa ang na-missing nga mao si Richard Larot, 34, taga Candanay Norte, Siquijor, padayon pa ang pagpangita kaniya.

Samtang ang mga power barges sa National Power Corporation nasudlan na og tubig ug gibanabanang 100 ka libo ka litrong krudo ang nayabo ngadto sa dagat. Sumala pa sa Control Operation sa Power barge 116 sa Larena pier nga si Arthur Jabines nakabaton og kadaot ang powerr barge human mapunay og kabangga sa pantalan tungod sa dagkong bawod.

Samtang naharos usab sa mga pananom sa maong lalawigan ug karong adlawa pa subling mobalik ang klase sa mga tunghaan. (BANAT NEWS)