CEBU, Philippines - Gidemalas sa unang adlaw sa iyang trabaho ang usa ka gwardiya human naunay sa iyang armas niadtong Lunes sa hapon diha sa gibantayang establisamento sa General Maxilom Avenue, Barangay Carreta ning dakbayan.
Giila sa kapulisan ang biktima nga si Michael Roxas, 40, nga nagtrabaho isip usa ka gwardiya sa St. Michael Agency ug nadestino sa CSK Trading, usa ka tindahan sa mga sakyanan.
Sa pakighinabi kang SPO1 Ruth Violango, ang imbestigador sa Homicide Section, matud pa pagka Lunes mao’y unang adlaw ni Roxas isip usa ka gwardiya.
Si Roxas nadestino sa CSK Trading pagkabuntag niana ug pagkahapon milingkod unta kini dihang kalit nga mibuto ang iyang armas nga usa ka rebolber nga isyu sa ahensiya ngadto kaniya.
“Mao’y iyang alegasyon na defective daw (ang armas). Wa pa g’yud daw ‘to niya tangtanga sa iyang holster,” matud pa kang Violango kinsa padayon pang nangita sa maong armas nga giingong gi-turnover na ngadto sa operations manager nga si Anecito Tony Gabatanya sa maong security agency.
“If wala sila’y ikapakita nga lisensya sa maong armas, ma-question gyud sila,” matud pa kang Violango.
Sa laing bahin, naangol ang usa ka batan-on human sa nahitabong karambola sa usa ka videokihan sa Sunny Hills sa barangay Talamban niadtong niaging Lunes sa kaadlawon.
Ang naangol mao si John Pansoy, 21, kinsa nakaangkon og samad dinunggaban gikan sa buak nga botelya dihang nakakita og away sa grupo sa mga batan-on. (EIM) (BANAT NEWS)