CEBU, Philippines - Ang Police Regional Office (PRO)-7 milibkas na sa suspension sa Permits to Carry Firearms Outside of Residence (PTCFORs) sa siyudad sa Sugbo kagahapon human sa walo ka adlaw nga pagpatuman niini tungod sa Thanksgiving Mass kang San Pedro Calungsod niadtong November 25.
Si Chief Supt. Marcelo Garbo Jr., PRO-7 director, nagkanayon nga sukad sa pagpatuman sa gun ban wala gyud silay nadakpan nga milapas niini sukad sa pagsugod.
“For the record wala kaming nakuha during that day considering the number of participants of the event,” matud ni Garbo.
Ang PRO-7 mipatuman sa city-wide heightened alert status lakip na ang suspension of the PTCFOR nga nagsugod niadtong November 25 aron sa pagsiguro sa seguridad sa katawhan nga mitambong sa maong kalihukan.
Kadto lang mga miyembro sa Philippine National Police, Armed Forces of the Philippines, ug laing law enforcement agencies nga adunay opisyal nga trabaho nga lambigit sa maong kalihukan ang gitugtan sa pagdala og armas.
Kini base sa Memorandum Circular Number 2011-021 or “Policies and Procedures in the Suspension of PTCFOR gikan sa Camp Crame.
Bisan pa sa 293 ka mga tawo nga samdan, si Garbo mihulagway sa misa nga malinawon tungod kay wala silay natala nga dagko nga insidente.
“DILG (Department of Interior and Local Government) Secretary Mar Roxas congratulated me for a job well done since everything was handled properly,” si Garbo midugang. (Ria Mae Booc/EIM) (BANAT NEWS)