Nag-inom gipusil angol sa silingan

CEBU, Philippines - Naangol ang usa ka lalaki human  kini  pusila  sa iyang  silingan  sa barangay Punta Ingaño, dakbayan sa Lapulapu sa miaging gabii.

Ang biktima mao si Jerwin Aldea Ignacio, 24, samtang  ang  suspetsado  mao   usab si Rodulfo Hesera, hingkod, nga   pulos nagpuyo sa maong dapit.

Si PO1 Jomar Florentino sa homicide section sa kapolisan sa maong dakbayan nga nahinabi sa Banat News miingon nga nag-inom sa  tindahan ni Hesera    ang biktima uban  sa    higala nila. Apan  dihang  nangalasbag  na kalit lang miulbo   ang panaglalis   sa duha  busa  gipamadlong  ni  Hesera.

Apan giingong  nagdumili sa pagsanong si Ignacio nga nakapaaghat   sa suspek  sa pagkuha sa iyang armas ug gipusil ang biktima sa makadaghang higayon.

Ang biktima nga  nahuwasan sa  kahubog dihang nagpaka-paka  na  ang  buto sa armas  ni Hesera misuway  og  dagan  apan malagmit  di hingigo  sa lawas  ang suspetsado, hinungdan  nga tiil  ray nasabak sa  biktima. Gihatud  dayon  ngadto  sa Lapulapu City Hospital  ang  biktima  samtang  ang suspetsado nadakpan  usab  dayon  sa kapolisan  ug   kasamtangang gibalhog sa  ilang  detention  cell samtang  gihikay  na  ang  tukmang kaso nga ipasaka  batok niini. (Romeo T. Limpangog/WC) (BANAT NEWS)