Gibalikosan sa bitin patay

CEBU, Philippines -  Patay ang usa ka lalaki human kini gikatahong gibalikosan og usa ka tulo ka metros nga bitin o python diha sa libon nga bahin sa Sitio Atabay, Barangay Macaas, Catmon sa miaging gabii.

Naabtan na lang nga wala nay kinabuhi si Alvin Molijon Sususco, 37, sa mga kabanay ug silingan nga miresponde unta kaniya. Giingong nagbalikos pa ang maong bitin sa iyang lawas dihang naabtan.

Sumala pa sa report si Alvin uban sa ig-agaw niini nga si Janelle Sususco giingong naglakaw paingon sa usa ka payag sa ibabaw nga bahin sa lugar mga alas 9:30 sa gabii dihang ilang nakit-an ang maong bitin.

Gikatahong naagni si Alvin nga dakpon ang maong halas apan gibadlong unta kini sa ig-agaw nga miingong mas maayong pasagdan na lang kini.

Apan imbes nga mopatuo gikatahong kalit nga gikuptan ni Alvin ang ulo sa bitin sa tuyo nga kini dakpon apan wala damhang kalit nga mibalikos ang lawas niini sa iyang liog.

Matud ni SPO2 Rex Menchavez, sa Catmon Police Station, pagkakita ni Janelle nga nagkalisod na si Alvin dali kining midagan balik sa ilang panimalay ug nangayo og tabang.

Ang mga igsuon ni Janelle nga sila si Jurix ug Reil daling mikuha og sundang ug dayong dagan sa nahimutangan ni Alvin.

Si Jurix mitigbas sa ikog sa bitin samtang si Riel mitigbas usab sa lawas niini apan dihang gibuhian sa bitin si Alvin patay na kini. Gituohang nagupok ang kabukogan ni Alvin gumikan sa pagbalikos. 

Sumala pa nga tulo ka metros ang gitas-on sa maong bitin ug dul-an napulo ka pulgadas ang gibag-on sa lawas niini.

Matud pa nga ang maong napatay nga bitin gi-turnover na ngadto sa Department of Environment and Natural Resources- Catmon ug mao nay milubong niini.  (BANAT NEWS)