Roxas misusi sa pangandam sa kapolisan

CEBU, Philippines -  Personal nga giinspeksyon ni Interior Secretary Mar Roxas kagahapon  ang South Road Properties (SRP) nga nahimutangan sa Templete ni San Pedro Calungsod  aron pagsuta  sa gihimong  pagpangandam   sa kapolisan ug kabomberohan alang  sa Thanksgiving Mass ugma nga tambongan  sa presidente  ug  bise  presidente  sa nasud.

Ang kapolisan sa Regional Police Office ug mga sakop sa Bureau of Fire Protection (BFP-7) mipakita  usab sa ilang security plan ngadto ni Roxas.  Gani, gitanyag ni Roxas nga ang mga pari lang maoy mopugong sa mga parokyano nga moduol ngadto sa Templete  aron sa pagsiguro  sa seguridad ni Presidente Benigno Noynoy Aquino ug Bise-Presidente Jejomar Binay nga motambong  sa maong  kalihokan  ugma. Gawas niini, napanglantawan usab ni Roxas nga hilabihan gayud kadaghan  sa mga tawo  nga  modugok  sa maong kalihokan sa maong higayon busa  nanghinaot lang siya nga makontrolar gayud kini sa kapolisan.

Gihangyo usab ni Roxas ang katawhan nga makig-alayon  sa kapolisan  kinsa  molusad  og  mga checkpoint  ug  mangrekisa  sa lawas  sa kadaghanan  aron  pagsanta  sa mga dautang  elemento.

Samtang  ang Task Force Calungsod uban ni Cebu City Police Office Director Sr. Supt. Melvin Ramon Buenafe nagkanayon  nga  andam  na  kaayo  ang  tanan  alang  sa maong kalihokan  ug ang kapolisan  nga  gidestino  sa SRP  kompleto  na  sa tanang  kasayoran  bahin  sa angay  nilang  buhaton  sa maong  higayon. (Lesley Caminade-Vestil/WC) (BANAT NEWS)