Gwen misugat kang San PedroCalungsod

CEBU, Philippines - Gipangulohan ni Governor Gwendolyn  Garcia ang pagsugat sa mga Sugboanon ni San Pedro Calungsod sa dihang mihapit  sa Capitol  ang balaang imahen sa unang santos  sa Sugbo sa  pagduaw  niini  dinhi  sa lalawigan  niadtong Martes.

Uban sa gobernador  nga mihimamat  sa bag-ong Santos  mao  ang tanang   mga department heads, consultants ug mga kawani sa Kapitolyo.

Sa  iyang  kahinam  nga mahimamat  ang  ikaduhang  santos  nga Filipino, wala  panumbalinga  sa gobernador  ang kainit sa adlaw ug kahuot sa  trapiko.

Kini  tungod  sa pagdagsa  sa kaliboan  ka  mga  deboto  nga  mihangop  sa imahe  ni  San Pedro  Calungsod, ang  santos  sa  mga  bata  ug  mga dalaga  ug  ulitawo. 

Ang paghapit ni San Pedro Calungsod sa Kapitolyo gisaksihan usab sa ubay -ubay nga mga estudyante gikan sa mga nagkadaiyang tulunghaan sa Sugbo.

Sa nasayran  gikan pa sa lalawigan sa Bohol ang imahen ni San Pedro Calungsod ug mitabok siya dinhi sa lalawigan sa Sugbo agi’g pagpangandam usab sa pagahimoon nga National Thanksgiving Mass ugma alang  kaniya  nga  adto himoa sa Cebu South Road Property

Ang  gobernador  nagtuo  nga gumikan  sa iyang  kasuod  ni Sto. Niño  ug  ni  San Pedro Calungsod  maglayag  ang  iyang kadaugan  sa umaabot  election sa sunod tuig. (WC)(BANAT NEWS)