CEBU, Philippines - Si Mayor Socrates Fernandez sa dakbayan sa Talisay nanghinaot nga ang mopuli sa hepe sa kapolisan sa siyudad nga si Superintendent Eddie Recamara makapadayon sa pagmentenar sa kahapsay ug kalinaw sa Talisay.
Si Recamara gitakdang ibalhin na og laing destino karong Disyembre 1, 2012 human sa thanksgiving mass ni San Pedro Calungsod.
Nasayran nga ang pagrelibo ni Recamara may labot sa gipasakang kaso batok kaniya sa usa ka piskal sa dakbayan sa Danao dihang siya pa ang hepe sa maong dakbayan.
Si Fernandez nga nahinabi sa mga tigbalita nagkanayon nga wala pa siya makadawat og lista sa mga ngalan sa mga opisyal nga papilian aron ihulip ni Recamara isip hepe sa kapolisan sa Talisay.
Ang mayor midayeg kang Recamara tungod sa daghang nasulbad niining mga krimen sa dakbayan ug nakapakunhod sa kriminalidad sa maong lugar. Ang mayor mapasalamaton kaayo kang Recamara sa gihatag niining maayong serbisyo sa Talisay ug matud ni Fernandez nga angay iampo sa tanan nga unta ang mopuling hepe sa kapolisan sa Talisay may hiyas ug katakus nga sama kang Recamara aron mapadayon niini ang pagmentenar sa kamalinawon sa siyudad.
Si Fernandez midugang nga dili usab niya pwedeng pugngan si Recamara nga magpabilin sa Talisay tungod kay isip polis obligado ang hepe sa pagsunod sa kamanduan sa iyang mga labaw.
Buot usab sa mayor nga ang mapuling hepe makabaton og maayong relasyon sa komunidad, mga lider sa barangay ug siyudad aron magkahiusa sa pagsulbad sa mga problema nga mohulga sa tibuok Talisay. (WC) (BANAT NEWS)