Dalagita napusilan angol sud sa peryahan

CEBU, Philippines - Samdan ang  usa  ka  babaye  human  kini pusila sa wala hiilhing  lalaki  sulod sa  peryahan  sa barangay Casili sa lungsod sa Consolacion   sa miaging gabii.

Ang biktima mao si Mary Grace Rabago Manderas, 16, dalagita, nga nagpuyo sa maong dapit

Si PO1 Ardian Balanay sa kapolisan sa maong lungsod nga nahinabi sa Banat News miingon nga nagbarug-barog lamang ang biktima sulod  sa  peryahan kauban sa mga silingan  niini nga mga batan-ong lalaki ug mga babaye.

Samtang  nagtan-aw sa kalingawan  ang  mga  batan-on sulod  sa peryahan ang  wala hiilhing  batan-on   nga lalaki kalit  nga miduol sa  grupo dayong  pamusil  niini   sa nagpundok nga mga batan-on.

Hinungdan  nga mikabad  og  panagan  ang maong  mga batan-on  kauban  ang  biktima  dihang maoy  namatngonan niini  nga  namanhod  iyang tuong ilok nga nagkadugo    nga  maoy hinungdan nga nangayo kini og panabang.

Dihang gisusi sa mga kauban  ilang  nasuta  nga  nasabak kini  sa bala  sa armas  busa dali kini nilang gihatod ngadto Eversely  Child  Sanitarium Provincial Hospital sa  dakbayan sa Mandaue  apan human sa pasiunang  pagtambal sa mga doktor gibalhin kini  ngadto sa Vicente Sotto Memorial Medical Center sa dakbayan  sa Sugbo.

Ang kapolisan sa maong lungsod padayong  nangita  karon  sa kriminal. (Romeo T.  Limpangog/WC) (BANAT NEWS)